Vaktsinalaý qarqynyn kúsheitý qajet. Bul týraly Úkimet otyrysynda QR Premer-Ministri Asqar Mamin aitty, dep habarlaidy "Ult aqparat".
«Naýqastanýdyń ósý qarqyny baiaýlady jáne epidemiologiialyq jaǵdai birtindep turaqtanyp keledi. Virýstyń reprodýktivtilik indeksi - 1,01. Infektsiialyq oryndar sanynyń 54 paiyzy, al reanimatsiialyq oryndardyń 45 paiyzy tolyq. Pandemiiadan shyǵýdyń birden-bir joly – ol vaktsinalaý. Qazirgi kezde 5,9 millionnan astam adam vaktsinanyń birinshi komponentin, shamamen 4,5 mln adam ekinshi komponentin aldy», - dedi Úkimet basshysy.
Alaida Asqar Mamin bul jetkiliksiz ekendigin basa aitty.
«Vaktsinalaý qarqynyn kúsheitý qajet. Bul máseleni, ásirese, Batys Qazaqstan, Mańǵystaý jáne Atyraý oblystarynyń ákimderi baqylaýǵa alýy jáne tamyzda vaktsinalaý josparynyń oryndalýyn qamtamasyz etýi tiis. Barlyq óńirde epidemiologiialyq jaǵdaidy baqylaýda ustaý qajet. Nur-Sultan, Almaty, Shymkent qalalary men Qaraǵandy oblysynyń ákimdikteri bul máselege erekshe nazar aýdarý kerek. Halyqtyń shekteý sharalaryn, ásirese, betperde rejimin saqtaýyn qamtamasyz etý qajet. Ol úshin monitoringilik toptardyń jumysyn jandandyryp, tártip buzýshylardy jaýapkershilikke tartý kerek», - dedi ol.
Premer-Ministr «Ashyq» júiesine qatysatyn kásipkerlik sýbektileriniń sany únemi artyp kele jatqanyn da atap ótti.
«Olardyń sany 5 esege - 21 myńnan 101 myńǵa deiin kóbeidi. Bul biznestiń jumysyn jalǵastyrýǵa múmkindik beredi. Sondyqtan «Ashyq» qosymshasyn qoldaný aiasyn odan ári de keńeitý qajet», - degen Asqar Mamin máseleni jalpy baqylaýda ustaýdy orynbasar Eraly Toǵjanovqa júktedi.
