Úkimet basshysy Asqar Mamin Memleket basshysy Qasym-Jomart Toqaevtyń óńir ákimi qyzmetine usynǵan Jeńis Qasymbektiń kandidatýrasyn qoldaǵan Qaraǵandy oblysy máslihatynyń kezekten tys sessiiasyna qatysty, dep habarlaidy "Ult aqparat".
Premer-Ministr jańa ákimdi Qaraǵandy oblysynyń aktivine tanystyra otyryp, onyń úlken tájiribesi men joǵary biliktiligin atap ótti.
«Jańa ákimniń aldyna óńirdi áleýmettik-ekonomikalyq damytý boiynsha salmaqty mindetter qoiyldy. Elbasy N. Nazarbaev pen Memleket basshysy Q. Toqaev Qaraǵandy oblysynyń damýyna erekshe kóńil bóledi. J. Qasymbektiń osy joǵary senimdi aqtaitynyna senimdimin», — dedi A. Mamin.
Premer-Ministr osyǵan deiin bolǵan ákim Erlan Qoshanovqa atqarǵan jumystary úshin alǵys bildirip, jańa qyzmetinde sáttilik tiledi.
Jeńis Mahmuduly Qasymbek 1975 jyly 7 mamyrda Jambyl oblysynyń Shý qalasynda dúniege kelgen. Qazaq memlekettik sáýlet-qurylys akademiiasyn «sáýletshi-dizainer» mamandyǵy boiynsha jáne L. N. Gýmilev atyndaǵy Eýraziia ulttyq ýniversitetin «memlekettik jáne jergilikti basqarý» mamandyǵy boiynsha aiaqtaǵan.
Eńbek jolyn 1997 jyly QazBSQA-da taǵylymger-zertteýshi retinde bastaǵan. Túrli jyldary «Temirbank» AAQ bas mamany, QR Monopoliiaǵa qarsy saiasat komitetiniń bólim basshysy, QR Kólik jáne kommýnikatsiia ministrliginiń Sý kóligi departamentiniń direktory, «Aqtaý halyqaralyq teńiz saýda porty» RMK direktory, QR kólik jáne kommýnikatsiialar vitse-ministri, QR Kólik jáne kommýnikatsiialar ministrliginiń jaýapty hatshysy laýazymdaryn atqarǵan. 2014 jylǵy naýryzda QR kólik jáne kommýnikatsiialar ministri bolyp, keiin QR investitsiialar jáne damý ministri bolyp, QR Indýstriia jáne infraqurylymdyq damý ministrliginiń basshysy bolyp taǵaiyndalǵan. 2019 jylǵy 25 aqpannan bastap qazirgi tańǵa deiin QR Premer-Ministriniń orynbasary qyzmetin atqardy.
