Úkimet basshysy Aqtóbege sapary kezinde arnaiy kiim tigetin tseh jumysymen tanysyp, ózine kúrtke satyp aldy, dep habarlaidy QazAqparat.
Jumysshylar kiimin tigýge daǵdylanǵan tsehqa búgin Premer - Ministr Asqar Mamin kirip, otandyq ónimniń sapasymen, baǵasymen tanysty.
Úkimet basshysy aralap kórgen «Global Spetsodejda» JShS-niń tigin tsehynda 200-den astam adam jumys isteidi. Onyń 30 paiyzy kópbalaly, az qamtylǵan otbasy músheleri men múmkindigi shekteýli jandar. 2004 jyldan beri jumys isteitin óndiris orny jylyna 250 myń kiim-keshek tigedi.
«Bar bolǵany 18 myń teńge turady. Jumysqa, is-saparǵa kiemin. Sapasy jaqsy, ózgelerge de satyp alýǵa keńes beremin», - dedi Úkimet basshysy.
Tseh matany Koreia, Resei, Túrkiiadan tapsyryspen aldyrady. Munaishylar men qurylysshylar kóp tapsyrys beretin tseh kez kelgen satyp alýshynyń ótinishin oryndai alady.
«Asqar Mamin 54 ólshemdi kúrtke satyp aldy. Ol óz kartasymen tólem jasady. Qunyn tómendetip jazý týraly oiymyzda bolmaǵan, bárine ortaq baǵamyz osy. Arnaiy kiimder qoljetimdi baǵada satylady», - kompaniia ókili Kseniia Manatova.
Aita keteiik, is-sapar kezinde Premer – Ministr Asqar Mamin Aqtóbe ferroqorytpa zaýytynyń jumysymen, kirpish zaýytynyń qurylysymen tanysty. Bar ónimdi eksporttap otyrǵan Aqtóbe ferroqorytpa zaýyty elimizde biregei jobany iske qosqan. Munda múmkindigi shekteýli adamdardy jumysqa ornalastyrýdyń erekshe tásili qoldanylady. Iaǵni, 12 jumysshy alyp, olardyń úiin komiýtermen jabdyqtap, zaýyt ishindegi beinebaqylaý kameralaryna tikelei qosylýǵa múmkindik bergen. Táýlik boiy baqylaý júrgizip, tehnikalyq qaýipsizdik erejesi buzylsa habar berip otyrady.
«Halyqtyń baqylaý» jobasy aiasynda múmkindigi shekteýli jandardyń úiine jumys bólmesin jasaqtap berdik. Dispetcherge birden habarlap, ereje buzylǵanyn aityp otyrady. Eki aida barlyǵy 600 buzýshylyq anyqtalǵan eken. Bizdiń jobany elimizdegi ózge óndiris oryndary kádesine jaratpaq», - dedi «QazHrom» TUK» AQ-nyń prezidenti Arman Esenjolov.
