Senat Tóraǵasy Máýlen Áshimbaev Mańǵystaý oblysyna keldi. Bul týraly ol jelidegi paraqshasynda jazdy, dep habarlaidy "Ult aqparat".
«Senatorlardyń óńirlerdegi jumysy jalǵasýda. Osyǵan orai Mańǵystaý oblysyna keldim.
Qazirgi tańda óńirdegi qýańshylyq bárimizdi alańdatyp otyr. Mal shyǵyny da tirkelgeni belgili. Sapar barysynda óńir basshylyǵymen, sondai-aq, jurtshylyqpen kezdesip, osy jáne ózge de ózekti máselelerdi talqyladyq.
Bul jaǵdai Memleket basshysynyń baqylaýynda. Prezidentimiz jýyrda ǵana ótken Úkimettiń keńeitilgen otyrysynda tiisti organdar men ákimdikterge naqty tapsyrmalar berdi.
Soǵan sáikes qiyndyqqa tap bolǵan sharýalarǵa júieli qoldaý kórsetiledi. Naqty aitqanda, sharýashylyqtardy jem-shóppen qamtamasyz etý úshin Úkimettiń rezervi paidalanylady. Qosymsha sýbsidiialar beriledi. Tótenshe shara retinde erekshe qorǵalatyn tabiǵi aýmaqtardan shóp jinaý múmkindigi qarastyrylady. Prezident jem-shóptiń ishki naryqta jetkilikti bolýy úshin ony shetke shyǵarýdy ýaqytsha toqtata turýdy da tapsyrdy. Bul jaǵdaidy ońaltý jolyndaǵy mańyzdy sheshim ekeni sózsiz. Qýańshylyq - tabiǵi jáne qaitalanyp otyratyn qubylys. Sondyqtan jedel sharalarmen qosa keshendi is-qimyl algoritmin ázirleý de mańyzdy. Jiynda Memleket basshysy osyndai naqty mindetterdi júktedi. Búgingi sapar barysynda osy máselelerge basa mán berip, Prezidentimizdiń tapsyrmalaryn óńirde iske asyrý barysyna nazar aýdardyq», - dep jazdy Máýlen Áshimbaev.
Sonymen qatar, ol sapar barysynda «Kaspii» sý tushytý zaýytynyń jumysymen tanysty. «Mańǵystaýda taza aýyz sý máselesi óte ózekti ekeni kópshilikke málim. Ony sheshý úshin osyndai nysandardyń mańyzy zor. Sapar aiasynda balyq jáne nan zaýyttarynyń qyzmetkerlerimen de kezdesip, Memleket basshysynyń jańǵyrý baǵdary men qabyldanǵan zańdardyń mańyzyna toqtaldyq.
Sondai-aq, búgin Ábish Kekilbaiuly atyndaǵy Mádeni ortalyqqa arnaiy at basyn burdym. Qabyrǵaly qalamger ári qairatker Ábish aǵamyzdyń ult tarihyndaǵy orny erekshe. Sondyqtan, ol kisiniń esimin ulyqtaý, bai ádebi murasyn dáripteý - barshamyz úshin abyroily mindet», - dep tolyqtyrdy Áshimbaev.
