QR Parlamenti Senatynyń tóraǵasy Máýlen Áshimbaev qazaq ádebietiniń klassigi, Qazaqstannyń Eńbek Eri Ábdijámil Nurpeiisovti týǵan kúnimen quttyqtady, dep habarlaidy "Ult aqparat".
«Búgin halyq jazýshysy, qazaq ádebietiniń klassigi, Qazaqstannyń Eńbek Eri Ábdijámil Nurpeiisovtiń týǵan kúni. Sanaly ǵumyryn jazý-syzýǵa arnaǵan aǵamyz 97 jasqa tolyp otyr. Qalamgerdiń ǵumyr jolyna qarap otyryp, ult tarihynyń ótken ǵasyrdaǵy tutas taraýlaryn kórýge bolady. Ábekeń bala kúninde tárkileý, asharshylyq siiaqty zobalańdardy basynan ótkerdi. On segizge tolar-tolmas shaǵynda soǵysqa attandy. Osynyń bári keiin jazýshynyń shyǵarmashylyǵyna arqaý boldy. Shyn máninde, sýretkerdiń qalamynan týǵan dúnieler – qazaq ádebietiniń altyn qoryna qosylǵan qymbat qazyna. Onyń ishinde «Qan men ter» jáne «Sońǵy paryz» romandarynyń shoqtyǵy biik. Bul shyǵarmalar qashanda ár býynnyń súiip oqityn týyndylary bolyp qala beredi», - dep jazdy Máýlen Áshimbaev Facebook paraqshasynda.
Senat spikeriniń atap ótýinshe, halyq jazýshysy shyǵarmalarynyń basym bóligin keńestik kezeńde jazdy. Degenmen, táýelsizdik alǵan tusta da ulttyq ádebiettiń órisin keńeitýge zor eńbek sińirdi. Qazaq PEN-klýbyn quryp, onyń janynan «Tań-Sholpan» atty ádebi jýrnal ashty. Bul egemendiktiń eleń-alań shaǵynda jańa zamanǵa beiimdele qoimaǵan qalamgerler úshin úlken qoldaý boldy.
«Osylaisha Ábekeń ádebietke degen adaldyqtyń ozyq úlgisin kórsetti. Jalpy, Ábdijámil aǵa týraly aitqanda, onyń tabandylyq, irilik, órlik qasietterine toqtalmai ketý múmkin emes. Rasymen, aǵamyz buralańy kóp ómir jolynda eshqashan óz biiginen tómendegen emes. Qashanda asqaq, aqsúiek, kerbez qalpyn saqtai bildi. Ardaqty Ábe! Týǵan kúnińizben quttyqtai otyryp, Sizge zor densaýlyq jáne amandyq tileimin! Eldiń yqylasyna bólenip, ortamyzda aman-esen júre berińiz», - dedi Senat tóraǵasy.
