Astanada politseiler qurylys materialdaryn jetkizip beremin degen syltaýmen turǵynnan 1,3 mln teńge alǵan kúdiktini anyqtady, dep habarlaidy ult.kz.
Tergeý málimetinshe, 44 jastaǵy elorda turǵyny jábirlenýshige qurylysqa qajetti kirpishti arzan ári qysqa merzimde jetkizip berýge ýáde bergen. Onyń sózine sengen azamat aldyn ala tólem retinde 1,3 mln teńgeni kúdiktiniń jeke esepshotyna aýdarǵan.
Alaida aqshany alǵannan keiin er adam ýádesinde turmaǵan. Aldymen tapsyrysty túrli syltaýmen keiinge qaldyryp júrgen. Keiin jábirlenýshimen bailanysyn múldem úzgen.
Jábirlenýshi politsiiaǵa aryzdanǵannan keiin júrgizilgen jedel-izdestirý sharalary barysynda kúdiktiniń kim ekeni anyqtaldy. Ol óz kinásin moiyndaǵan.
Qazir atalǵan fakti boiynsha sotqa deiingi tergep-tekserý júrgizilip jatyr.
Politsiia azamattardy qurylys materialdary men basqa da qymbat taýarlardy satyp alǵanda satýshynyń jeke basyn, qyzmetiniń zańdylyǵyn jáne iskerlik bedelin muqiiat tekserýge shaqyrdy.
