20 tamyzǵa deiin Arys qalasyndaǵy 64 áleýmettik nysandy jóndeý jumystary aiaqtalady, dep habarlaidy QazAqparat.
Bul týraly «Samuryq-Qazyna» jyljymaityn múlik qory» AQ Basqarma tóraǵasynyń orynbasary Arman Jetpisbai málimdedi.
«2019 jyldyń 10 shildesinde bekitilgen QR Úkimetiniń qaýlysymen «Samuryq-Qazyna» qory Arystaǵy jarylystan zaqym kelgen áleýmettik nysandardy qalpyna keltirýdi qarjylandyrdy. Barlyq jumystar shilde aiynda bastaldy. Jalpy sany 68 nysandy qalpyna keltirý josparlanǵan. Onyń ishinde 16 mektep, 1 kolledj, 36 balabaqsha, 8 densaýlyq saqtaý nysany jáne 4 sporttyq nysan bar jáne Arys temirjol vokzalyn, Batyrlar alleiasy men Ortalyq alańdy qalpyna keltirý jumystary júrip jatyr», - dedi Arman Jetpisbai «Samuryq-Qazyna» ǵimaratynda ótken baspasóz máslihatynda.
Sonymen birge, jóndeý jumystary júrip jatqan nysandar arasynda jergilikti mańyzy bar tarihi ǵimarat bar.
«Arys temir jol vokzaly – qalanyń kórneki oryndarynyń biri. Ol 1904 jyly boiy kótergen jáne tarihi turǵyda asa mańyzdy nysan bolyp sanalady. 2010 jyly Ońtústik Qazaqstan oblysy ákiminiń qaýlysymen vokzal jergilikti mańyzy bar eskertkishter tizimine engen. Ondaǵy jóndeý jumystary 24 tamyzǵa deiin aiaqtalýy tiis. Merdiger kompaniia osyndai nysandarda jóndeý júrgizýge ruqsaty bar kompaniiamen birlesip jumys isteýde. Ǵimarattyń sáýlettik kelbeti men konstrýktivtiligi burynǵydai saqtalady», - dep túsindirdi Arman Jetpisbai.
Atalǵan nysandardyń 64-i qaita jóndeýden ótedi jáne 4-eýi súrilip, qaita salynady.
«Jedel meditsinalyq járdem bólimi, stomatologiia bólimi, balalar men jasóspirimderdiń sporttyq mektebi men «Bekzada» balabaqshasynyń ǵimarattary jańadan salynady. Bul 4 ǵimarat qyrkúiek-qazan ailarynda paidalanýǵa beriledi. Osy jumystardyń barlyǵyna «Samuryq-Qazyna» qory 7 mlrd teńge bóldi. Premer-Ministr Asqar Maminniń tapsyrmasyna sáikes, barlyq jóndeý jumystary 20 tamyzǵa deiin, iaǵni jańa oqý jylyna deiin aiaqtalýy tiis. Úkimet basshysy apta saiyn Arys qalasyna barady, biz oǵan atqarylǵan jumys boiynsha esep beremiz. Ázirge, 56 nysandy jóndeý jumystary tolyq aiaqtaldy, 8 nysan 20 tamyzǵa deiin qoldanysqa beriledi», - dedi A. Jetpisbai.
Onyń aitýynsha, qoldanylǵan qurylys materialdary barlyq normalar men talaptarǵa sai, sapa sertifikattaryna ie. Barlyq 16 mektep jihaz, parta, shkaf, taqta syndy qajetti jabdyqtarmen qamtylady.
Eske sala ketsek, 24 maýsym kúni tańerteń Arys qalasyndaǵy áskeri bólimniń qoimasynda jarylys bolǵan edi. Ondaǵy úi-jailar men ǵimarattardyń 80-90 paiyzyna túrli deńgeide zaqym keldi.
