Túrkistan oblysynyń ákimi Ómirzaq Shókeev Arys qalasyn qalpyna keltirý jumystaryn júrgizýge qatysty apparat jiynyn ótkizdi, dep habarlaidy "Ult aqparat" óńir basshysynyń baspasóz qyzmetine silteme jasap.
Jiynǵa Qazaqstannyń barlyq oblystarynan kelgen Arys qalasynda júrgizip jatqan qurylys jumystaryna jaýaptylar, Túrkistan oblystyq basqarma basshylary men aýdandyq ákimdik mamandary qatysty.
Basqosýda Arys qalasyndaǵy turǵyn úiler men áleýmettik nysandar jáne joldarda júrgizilip jatqan qurylys jumystaryna qatysty sońǵy málimetter boiynsha baiandama jasaldy. Jiynda sóz alǵan qurylysshylar kedergi keltirip jatqan birqatar kemshilikterdiń basyn ashty.
«Jalpy 7 500-den astam úidiń arasynda sanaýly úi ieleri saraptaý qorytyndysymen kelispei otyr. Olar kúrdeli jóndeýdiń ornyna úilerin túgel kúrep tastap, qaita salýdy talap etýde. Barlyǵyna eskertý jasaldy», - dedi oblystyq Qurylys basqarmasy basshysynyń orynbasary Erbol Ahmetov.
Bul máseleler jaqyn kúnderi sheshimin tappaq. Jalpy Arys qalasyndaǵy qurylys jáne qalpyna keltirý jumystary aiaqtalýǵa jaqyn. Qazirgi kezde tolyqtai kúrelip, jańadan salynyp jatqan úilerdiń qurylysy táýlik boiy júrip jatyr.
Túrkistan oblysynyń ákimi Ómirzaq Shókeev barlyq sektor jaýaptylaryna qurylys jumystaryn aiaqtaý merzimin belgilengen keste boiynsha, tolyq aiaqtap ótkizýdi buiyrdy. Arys qalasynda jóndeýdi qajet etetin 7 163 nysannyń 7 154-inde turǵyn jáne kópqabatty úilerde qurylys jumystary aiaqtalyp, ishki árleý jalǵasýda. Qalpyna keltirý jumystaryna 126 qurylys kompaniiasy, 4 myńǵa jýyq jumysshy, 200-den astam arnaiy tehnika tartylǵan.
