Arystaǵy oqiǵa saldaryn joiý boiynsha eń kúrdeli ári qaýipti jumystar bastaldy. Bul týraly Úkimet otyrysynan keiin QR Qorǵanys ministri Nurlan Ermekbaev málim etti, dep habarlaidy QazAqparat.
«Qazirgi ýaqytta Arystaǵy oqiǵa saldaryn joiý boiynsha jumystardy júrgizýdiń eń qiyn, jaýapty ári táýekeldi kezeńi bastalǵanyn túsiný kerek. Áskeri qyzmetshiler áskeri bólim ainalasyn tolyqtai tazartty. Iaǵni qalaǵa, onyń turǵyndary men sol mańaidaǵy eldi mekenderge qaýip tónip turǵan joq», - dedi N. Ermekbaev tilshiler saýalyna jaýap bere otyryp.
Sonymen qatar ol TJ saldaryn joiý boiynsha jumystar jalǵasatynyn jetkizdi.
«Barlyq jerdi tazarttyq jáne tiisti sharalardy jalǵastyrýdamyz. Qazirgi kezde áskeri bólim men qoimalar ishinde negizgi jumystar bastaldy. Bul jerlerde fragmentter, oq-dári synyqtarymen ózge de jarylmaǵan zattar shoǵyrlanǵan. Osy oraida saperlerdiń jumysy qaýipti bolyp tur», - dedi vedomstvo basshysy.
Budan buryn habarlanǵandai, 21 qyrkúiek kúni arnaiy jasaqtalǵan poligon (Arys qalasynan 60 shaqyrym jerde) aýmaǵyndaǵy josparly jarylys jasaý jumystary barysynda oq-dári fragmenti ózdiginen jaryldy. Sonyń saldarynan arnaiy daiyndyqtan ótken 10 saper - kelisimshart áskeri qyzmetshisi jarqynshaq tiip jaraqat aldy.
