Qazaqstan Respýblikasynyń Prezidenti Qasym-Jomart Toqaevtyń Jarlyǵymen Túrkistan oblysynyń birneshe politsiia qyzmetkeri marapattaldy.
Arys qalasynyń turǵyndaryn qaýipsiz aimaqqa kóshirip, qoǵamdyq tártipti qamtamasyz etken jáne azamattardyń múlikterin saqtaýda ózine berilgen tapsyrmany joǵary deńgeide uiymdastyra bilgen tártip saqshylaryna qurmet kórsetildi, dep habarlaidy "Ult aqparat".
El basyna kún týǵan sátte óziniń qyzmettik mindetterin adal, ári asqan tabandylyqpen oryndaǵan tártip saqshylaryn Túrkistan oblystyq Politsiia departamentiniń bastyǵy, politsiia general-maiory Qairat Dálbekov saltanatty túrde marapattady. Antyna adal bolyp, eńbegi elengen qyzmetkerlerge syi-siiapat jasady.
«Árqashanda, osyndai batyl da batyr bolyńyzdar. Sizder halyqtyń qaýipsizdigin, qoǵamnyń tynyshtyǵyn saqtaýda aianbadyńyzdar, mindetterińizdi minsiz atqardyńyzdar. Eń bastysy maqtaýǵa laiyqty jumys jasadyńyzdar. Men óz atymnan alǵys bildire otyryp, jumystaryńyzǵa sáttilik, otbasylaryńyzǵa amandyq tileimin», - dedi Qairat Dálbekov.
Eńbegi elengen politseilerdiń qatarynan departament bastyǵynyń orynbasary, politsiia polkovnigi Abdiǵani Seidýaliev te tabylyp, oǵan II dárejeli «Aibyn» ordeni tapsyryldy. Sondai-aq, Prezident marapatyna Arys APB bastyǵy, politsiia polkovnigi Nurlan Isabekov, osy aýdannyń politsiia bóliminiń politsiia kapitany Nurmahanbet Erkebaev, politsiia kapitany Mars Asanbaev, politsiia kapitany, Nursultan Nabialiev, politsiia maiory Tólegen Rysbekov, politsiia aǵa leitenanty Dáýlet Tóretaiuly, politsiia aǵa serjanty Jaqsylyq Táttibekovter laiyqty dep tanyldy. Olarǵa «Erligi úshin» medali tabystaldy.
