Arys qalasynda bolǵan jarylystan qaza tapqan áskeriler aǵa serjant Baýyrjan Álimbekov pen serjant Ábdiqul Ahmetovtiń týystary marqumdardyń otbasylaryna memleket tarapynan qandai kómek kórsetilgenin aityp berdi, dep habarlaidy QazAqparat.
Marqum Baýyrjan Álimbekovtyń anasy Lázzat Súiindikovanyń aitýynsha, ajal qushqan jalǵyz ulynyń artynda jary men tórt perzenti qalǵan. Tuńǵyshy 7 jastaǵy qyz bolsa, eń kishkentaiy alty ailyq náreste. Uly áskeri bólimdegi órtti óshiremin dep baqilyq bolǵannan keiin Qorǵanys ministrligi jarylystan zaqymdanǵan onyń baspanasyn jóndep bergen. Sonymen qatar, moraldyq jáne materialdyq kómek kórsetken.
«Balamnyń bes jyldyq jalaqysyn ótemaqy retinde tóledi. Sodan keiin baspana alýǵa qomaqty aqsha aýdardy. Ol qarajatty ýaqyty kelgende úi alý úshin áieli men balalarynyń atynan «Turǵyn úi qurylys jinaq bankine» saldyq», - deidi Lázzat Súiindikova.
Jalǵyz ulynan aiyrylǵan ananyń sózinshe, ministrlik basshylyǵy, sondai-aq áskeri bolǵysy kelgen nemerelerin «Jas ulan» mektebine esh kedergisiz jáne emtihansyz qabyldaitynyn aitqan.
Al marqum bolǵan ekinshi áskeri qyzmetshi Ábdiqul Ahmetovtiń artynda jas kelinshegi men jalǵyz qyzy qaldy. Perzenti Aibibi endi ǵana bir jastan asqanyna qaramastan, ol ákesin izdeidi eken. Bul týraly jary Arailym Qadirova aityp berdi.
«Meniń kúieýim áskeri bólimde alty jyldai qyzmet atqardy. Ol jumysyn óte qatty jaqsy kóretin. Tipti, otbasynan da biik qoiatyn dep aitsam bolady. Jumysyna eshqashan keshigip barmaityn, eshqashan suranǵan da emes. Sondai altyn adam bolatyn. Jaman aty shyqqan emes. Qazir bárimiz tús kórgendei bolyp qaldyq. Qyzy da áskeri formadaǵy adamdardy kórse, ákesin izdeidi. Kúieýim de qyzyn jaqsy kóretini sonshalyq, bos ýaqytyn sonymen ótkizýge tyrysatyn edi», - deidi Á.Ahmetovtiń jary.
Eske salaiyq, Arystaǵy jarylys saldarynan qaza tapqan eki áskeri qyzmetshi memlekettik nagradalarmen marapattalǵan bolatyn. Ótken aptada aǵa serjant Baýyrjan Álimbekov pen serjant Ábdiqul Ahmetovtiń týystaryna Qorǵanys ministri Nurlan Ermekbaev II dárejeli «Aibyn» ordenderin tabys etti.
