Arys qalasynda «Qazaq eline alǵys» memorialdy taqtasynyń ashylý saltanaty ótti.
Ol 2019 jylǵy 24 maýsymda bolǵan jarylystyń zardabyn joiýǵa qatysqan barsha azamattar men óńirlerge alǵys retinde ornatylyp otyr, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
Jiynǵa Arys qalasynyń ákimi Gúljan Qurmanbekova, qalalyq máslihattyń hatshysy A.Baitanaev, eńbek ardagerleri, men ziialy qaýym ókilderi qatysty. Sharada alǵash sóz alǵan shahar basshysy memorialdy taqtanyń mán-mańyzyna toqtaldy.
«Arys qalasyn qaita qalpyna keltirý jumystary Elbasy N.Nazarbaevtyń, Memleket basshysy Q.Toqaevtyń, QR Premer Ministri A.Maminniń, oblys ákimi Ó.Shókeevtiń tikelei baqylaýynda boldy. Úkimet basshysynyń tapsyrmasyna sáikes, Arys qalasynyń aýmaǵy 17 sektorǵa bólinip, Nur-Sultan, Almaty, Shymkent qalalary men oblystarǵa bekitilip berildi. Oblys ákiminiń basshylyǵymen turǵyndardy azyq-túlikpen qamtamasyz etý, qoǵamdyq tártipti saqtaý, qalany qaita qalpyna keltirý maqsatynda 17 shtab quryldy. Az ǵana ýaqyttyń ishinde qala túgeldei jańǵyrdy, jańadan úiler salynyp, zaqymdanǵan ǵimarattar qaita qalpyna keltirilip, joldar jańardy. Jańa nysandar boi kóterdi. Arys qalasy jańa keiipke endi. Bul búkil eldiń jumyla kirisip, birlikpen atqarǵan isiniń nátijesi. Sondyqtan Arys qalasy turǵyndary qalany qalpyna keltirýge atsalysqan barsha otandastarymyzǵa, Qazaq Eline alǵys aitady», - dedi Gúljan Mamytqyzy.
Jiyn sońy mádeniet úii qyzmetkerleriniń kontserttik baǵdarlamasyna ulasty. Memorialdy taqtany jasaǵan jergilikti músinshi Mútálip Kúzdeýbaev, al taqtadaǵy mátin avtory jergilikti aqyn Myńjasar Dármenov.
