Búgin Arys qalasyndaǵy Jambyl oblysy men Shardara aýdanyna tiesili 3-sektordaǵy qurylys jumystarynyń aiaqtalýyna orai saltanatty shara ótti, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
Jiynda Túrkistan oblysy ákiminiń birinshi orynbasary Qosman Aitmuhametov Arys qalasyn qaita qalpyna keltirýge atsalysqan qurylysshylar men belsendi azamattarǵa alǵysyn bildirdi. Sonymen qatar, Jambyl oblysy ákiminiń orynbasary Erkebulan Daýylbaev qalada oryn alǵan tótenshe jaǵdaidyń zardaptaryn joiýǵa jumyla kirisken kópshilikke alǵys aityp, oqys oqiǵalardyń endi elimizde oryn almaýyn tiledi.
Sondai-aq, Jambyl oblystyq máslihatynyń hatshysy Baǵlan Qarasholaqov, Arys qalasynyń ákimi Murat Qadyrbek jáne basqa da azamattar jambyldyq qurylysshylardyń tabandy tirligin, eleýli eńbegin tilge tiek etti.
Aitýly sharada Arys qalasyndaǵy qurylys-jóndeý jumystaryna belsene aralasqan qurylysshylar, merdigerler, belsendi azamattar men ákimdik qyzmetkerleri arnaiy alǵys hattarmen marapattaldy.
Saltanatty jiyn «Arysty terbetken Áýlieata áýenderi» atty K.Ázirbaev atyndaǵy Jambyl oblystyq filarmoniiasynyń kontserttik baǵdarlamasyna ulasty.
Sondai-aq, shara aiasynda jarylys kezinde qirap, qaita basynan boi kótergen 4 úi saltanatty túrde ielerine tabystaldy. Bul úilerdiń ekeýi basynan boi kóterip, ekeýi tolyq jańǵyrtylǵan. Qurylysyn júrgizgen merdiger kompaniia atalǵan úi ielerine óz syi-siiapattaryn jasady.
Aita keterligi, Arys qalasyndaǵy Jambyl oblysynyń shtabyna qarasty 3-sektorǵa 11 kóshe bekitilgen. Onda 312 jeke turǵyn úilermen birge 14 áleýmettik jáne kommertsiialyq nysan bar. Zerdeleýden ótken jeke turǵyn úidiń barlyǵynyń aqaý aktileri toltyrylyp, smetalaý jumystary jasalǵan.
Nátijesinde qiraǵan 4 úi basynan boi kóterip, qalǵan 309 úige túrli jóndeý jumystary júrgizilip, qalpyna keltirildi. Bul jumystarǵa 4 merdiger kompaniia, 500-den asa qurylysshy tartylǵan. Tiisti shyǵyndar respýblikalyq biýdjet pen arnaiy qorǵa jinaqtalǵan qarjydan qarastyryldy.
