Aqmola oblysynyń Arshaly aýdanynda «Rýhani jańǵyrý» baǵdarlamasy sheńberinde 164 joba júzege asyrylǵan. Bul týraly óńirlik kommýnikatsiialar qyzmetinde ótken brifingte aýdan ákimi Talǵat Muhanbedjanov aitty.
Ákimniń sózinshe, biylǵy Jastar jyly aiasynda «Imanjúsip Qutpanuly: taǵdyr taǵylymy» atty oblystyq jas aqyndar baiqaýy ótkizilipti. Sondai-aq, aýdan turǵyndary «Aqmola juldyzdary» oblystyq kórkemónerpazdar baiqaýyna, «Arshaly daryny» ǵylymi jumystar baiqaýyna da belsene qatysqan.
«Rýhani jańǵyrý» baǵdarlamasy – ideologiialyq mańyzdy strategiialyq qujat. Munda qoǵamymyzdyń damýy, ultymyzdyń qalyptasýy, salt-sanamyz ben qazaqstandyq mádenietti saqtaý joldary naqty aitylǵan. «Týǵan jer» arnaiy baǵdarlamasy aiasynda metsenattardyń qarjylai kómeginiń arqasynda 3 áleýmettik nysan qaita jańartyldy. Ijevsk aýylyndaǵy dárigerlik ambýlatoriiaǵa kúrdeli jóndeý júrgizildi. Barlyq áleýmettik jobalarǵa qoldaý kórsetetin metsenatymyz Ibragim Janǵorazovtyń esimin erekshe atap ótkim keledi. Kásipker jas mamandardy qoldaý maqsatymen eki kóppáterli turǵyn úidi kúrdeli jóndeýden ótkizdi», – dedi Talǵat Muhanbedjanov.
Sonymen qatar, aýdan ákimi kásipker Aleksandr Gýsevtiń de «Týǵan jer» baǵdarlamasyn iske asyrýǵa atsalysyp, aýdandaǵy balabaqshany kúrdeli jóndeýden ótkizýge qarajat bólgenin erekshe atap ótti. Brifingte «Eńbek-1» jaýapkershiligi shekteýli seriktestigin basqaryp otyrǵan metsenat Baǵdat Amangeldiqyzynyń esimi de ataýsyz qalmady. Ol Konstantinovka aýyldyq okrýgine jedel járdem kóligin satyp áperipti. Búgingi tańda aýdanda kieli jerlerdi qalpyna keltirý jumystary qarqyndy júrgizilýde. «Kieli jerler geografiiasy» arnaiy jobasy aiasynda osy óńirden shyqqan ataqty aqyn Imanjúsip Qutpanulynyń ómirin kópshilikke nasihattaý maqsatynda sharalar qolǵa alynǵan.
Sondai-aq, aýdanda aty ańyzǵa toly Aiýly shoqysy men Jylantas dep atalatyn kieli oryndar bar. Halyq aýzynda Kúzetshitaý dep este qalǵan Aiýly shoqysy tabiǵi eskertkishi Arshaly aýdanynyń Konstantinov selolyq okrýginiń aimaǵynda ornalasqan. Jońǵar basqynshylyǵy kezderinde Aiýly shoqysy qorǵanys beketi bolǵan desedi. Aiýly shoqysynda qaraýyldaǵan kúzetshi ońtústik-shyǵys jaqtan kele jatqan jaýdy kórip ot jaǵyp belgi beretin, al aýyl turǵyndary otty kórip úńgirlerge tyǵylǵan eken. «Jalpy, aýdanda kieli jerler barshylyq. Búgingi kúni olardy zerttep, nasihattaý basty jumysymyz. Osy baǵytta «Rýhani jańǵyrý» baǵdarlamasy aiasynda jalpy somasy 70 million teńgeni quraityn 164 joba iske asyryldy», dep tolyqtyrdy aýdan ákimi.
