Foto ashyq derekkózden alyndy
Sońǵy ýaqytta Tiktok áleýmettik jelisi arqyly kópshiliktiń yqylasyna bólenip júrgen Nurlan qajy Baijigituly ózi úshin bul jeli jańalyq emes ekenin aitady. Jalpy, onyń el aldynda júrgenine 30 jylǵa taiaǵan.
Osy oraida Nurlan imam atymen tanymal bolǵan qajy Ult.kz tilshisiniń birneshe suraǵyna jaýap berdi. Ol meshittegi din ýaǵyzy men áleýmettik jelidegi nasihattyń aiyrmashylyǵy týraly aitty.
«Men úshin Tiktok jelisi jańalyq emes. Sebebi kópshilik aldynda júrgenime otyz jylǵa taiady. Buǵan deiin Qazaqstannyń úsh-tórt oblysynda din ókili bolsam, úsh-tórt múftimen qatar qyzmet atqaryp kelemin. Áleýmettik jelige erterek kóńil bólgenimde, búgingiden de basqalai bolar ma edi, kim bilsin. Degenmen, qai oblysqa qadam bassam da, aldymdaǵy jamaǵatym kún saiyn kóbeimese, esh azaiǵan emes. Aiyrmashylyǵy sol, Allanyń úiindegi din ýaǵyzy tereńinen, al jelidegi din nasihaty qysqa-nusqa kúide ótedi. Sondyqtan qai jeli bolmasyn, meili ol Instagram, meili YouTube, meili ol Tiktok bolsyn - din adamy úshin búgingi kúnniń minberi, nasihat quraly. Al, Tiktok jelisin tańdaýyma sebepker - qazaq jastary. Meni bul qatty alańdatady. Óitkeni olar dinimiz ben dástúrimizdi jalǵastyrýshylar, jańǵyrtýshylar bolyp qalýy tiis», – deidi Nurlan qajy Baijigituly.
Degenmen Nurlan imamdy oqyrmandary birden qabyldamaǵan. Jelidegi qazirgi tanymaldylyǵy men oqyrmandar sanyna ońailyqpen jetpegenin, arada kóptegen túsinispeýshilikter bolǵanyn da jasyrmady.
«Iá, birden qabyldady demeimin. Arada túsinispeýshilikter boldy, keibireýler tikelei efirlerde «Neǵyp otyrsyń?», «Shal ket», «Uialmaisyń ba?», «Nurimam» degen syqyldy qarsy pikirler, tipti boqaýyz sózderdiń túrlerin jazdy. Mundai negativterge kóńil bólmedim demeimin, kerisinshe eskertý berdim. Biraq erinbei skrinshottap, sol paraqshalardy keiinnen aqtarǵanymda, biri - eresek, biri - jas, biri mektep oqýshysy bolyp shyqty. Olarmen sóilestim desem de bolady», – deidi imam.
Onyń aitýynsha, áleýmettik jelidegi oqyrman ǵana emes, áriptesteri de durys qabyldai almaǵan, arasynda tipti kelemejdegender de tabylǵan.
«Bul eshteńe emes, áriptesterimniń ózi tý syrtymnan «Ártis imam kele jatyr», «Tik-toker imam» degen mysqyldy mazaqtaryn el arasyna tarata bastady. Alaida, men úshin jastar joǵary turdy. «Jastardyń sanasyn jaqsy jaqqa burýym kerek!» degen maqsatym bir eli artqa shegindirmedi, jolymnan taidyrmady. Tek, sol ýaqytta jelini jaýlaǵan mektep oqýshylaryna qairan qaldym. Olar ne istep otyr, sabaqtary qaida, ata-analary qaida, tárbie qaida degen suraqtar mazalady. Dese de, suranystyń baryn áý bastan sezdim. Óitkeni efirlerime zertteý júrgize bastadym. Suraqtardyń leginen halyqtyń kómeii kórine bastady», – deidi Nurlan qajy.
Aitýynsha, ol jastardy ózine tartý úshin ádis-tásilder qoldaný keregin túsinedi. Bastapqyda úsh kúnde bir efir, bir jarym aidan soń, kún ara efirge shyǵýdy ádetke ainaldyrady. Osydan keiin jastardyń kóńilinen oryn alady. Jastar qyzyǵa, al halyq qoldai bastaidy. Imamnyń aitýynsha, onyń jekesine jazylatyn suraqtar legi esepsiz. Tipti, áli kúnge deiin jaýap berilmegenderi bar. Óitkeni, fizikalyq turǵyda jaýap berýge ýaqyt bóle almai jatqan kórinedi. Oqyrmandarynyń sany da ai saiyn bir temppen ósip otyr.
«Ýaqytym bolsa, kúnine eki-úsh saǵatymdy jelilerdegi jekeme kelgen hattarǵa jaýap berýge bólemin. Shamam jetip jatsa, keide bes-alty saǵatym bólinedi. Bul - efirlerdiń syrtynda bólinetin saǵattar. Al, kún ara eki saǵattan kem emes júrgiziletin efirler - olar óz aldyna bir bólek. Keiingi ýaqytta azaitýyma týra keldi. Sebebi ýaqytym burynǵydan da tyǵyz bola bastady. Sodan soń jastardyń efirlerime qyzyqqany sonsha, birde-bireýin qaldyrmastan tyńdap, keregin de, kerek emesin de uialy telefondaryna jazyp alyp, tarata beretinge kóshti. Tipti, óz paraqshamnyń qaralymynan asyp túsetin hálge jetkizdi. Bul úshin olardy sókpeimin, renjimeimin.
Qai jelini bolmasyn, adam qandai nietpen qoldansa, solai qabyldanady. Iaǵni Tiktok-tyń álemdik brendke ótýine sebepker adamdar, qysqa-nusqa dúnielermen sanany tez jaýlap aldy. Al, osy qysqa-nusqany dúnieni qalai qoldansam degen oi mende áý basta boldy. "Sheshingen adam sýdan taiynbas" demekshi, adamǵa alynbaityn qamal bar ma?! "Táýekel túbi – jel qaiyq" degendei, bizder iaǵni qazaq halqy astarsyz quraq quramaǵan elmiz, sol siiaqty qysqa oidy dinmen sabaqtap, dástúrmen oiladym. Tiktok-tyń paidasy – jeńil, ziiany – ýaqyt jeidi, kózdi jeidi», – dedi Nurlan qajy Baijigituly.
