Búgin Taldyqorǵanda Almaty oblysy ákiminiń júldesi úshin ardagerler arasynda biliardtan «Jetisý kýbogy» respýblikalyq týrniri bastaldy. Jarysqa elimizdiń túkpir-túkpirinen 13 komanda qatysýda. Týrnirdiń ashylýymen sportshylardy oblys ákimi Amandyq Batalov quttyqtady.
- Biz Taldyqorǵanda biliardtan respýblikalyq týrnirdi ekinshi jyl qatarynan ótkizip otyrmyz. Qatysýshylar sanynyń artyp kele jatqany bizdi qýantady. Biylǵy jyly komandalar sany 13-ke jetti. Aldaǵy ýaqytta týrnir halyqaralyq deńgeige kóterilip, biliard sportyn jaqsy kóretin jandardy biriktirýge úles qosady dep oilaimyn. Qatysýshylardyń barlyǵyna oblys turǵyndary atynan alǵys aityp, oiynda sáttilik tileimin, - dedi A. Batalov.
Týrnirge qatysýshylar men qonaqtardy «Álem qyrandary» biliardshylar qaýymdastyǵynyń prezidenti, QR eńbek sińirgen qairatkeri, jazýshy Sádibek Túgel quttyqtap, biliard sportyn damytýǵa qosqan úlesi úshin oblys ákimi Amandyq Batalovqa «Qurmetti biliardshy» qurmetti ordenin taqty.
Saltanatty sharadan keiin týrnirdiń qatysýshylary men qonaqtary biliard zalynda týrnirdi bastap ketti.
Atap ótsek, biylǵy jyly jarysqa Nur-Sultan, Almaty, Shymkent qalalary men Almaty jáne Shyǵys Qazaqstan oblystarynan 13 komanda baq synaidy.
Jarystar «Jastar» Sport saraiyndaǵy biliard zalynda, «Elit» jáne «Aiser» biliard klýbtarynda 14 qyrkúiekke deiin jalǵasady.
