Qyzylorda oblysynyń Aral aýdanynda qýańshylyq saldarynan 481 bas mal shyǵynǵa ushyrady, dep habarlaidy "Ult aqparat".
Aral óńiri turǵyndaryn jyl basynan beri tabiǵi qubylystar ábigerge saldy. Aldymen Syrdariiadan keletin sý tapshylyǵynyń azabyn tartty. Saldarynan óńirdegi jaiylym jutań tartyp, qoldaǵy tórt túlik azyq eterlik shóp qalǵan joq. Oǵan qosa qys pen kóktem mezgilderinde jaýyn-shashyn az tústi. Osyndai keleńsizdik mal shyǵynyna alyp keldi. Aýdanda barlyǵy 481 mal ólgen. Onyń ishinde 321-i jylqy bolsa, 159-y siyr, bireýi túie bolyp otyr. Mundai keleńsiz kórinis aýdandaǵy 8 eldi mekende baiqalǵan.
«Aita keteiik, ólgen maldarda eshqandai juqpaly aýrý belgisi baiqalǵan joq. Ony veterinariia mamandary anyqtap, tiisti hattama jasady. Aldaǵy ýaqytta mundai keleńsizdikke jol bermeý qadaǵalanady. Bul oraida kezekshilik uiymdastyrý qolǵa alynyp otyr. Oǵan aýyl turǵyndary, eriktiler, jedel qutqarý jasaǵy jáne aýdandyq tótenshe jaǵdailar bóliminiń mamandary engizilgen. Maldarǵa arnaiy baqtashylar bekitýge nazar aýdaryldy», - dedi aýdan ákiminiń orynbasary Erkin Ábishev.
Onyń aitýynsha, qazir jem-shóp qoryn jasaqtaýǵa basa nazar aýdarylýda. Osy oraida kórshiles Aqtóbe oblysynyń Yrǵyz aýdany men óńirdegi Aralmen irgeles jatqan ózge aýdandardan atalǵan máselege bailanysty kelisim jasalýda. Qazirge deiin aýdanǵa barlyǵy 116 tonna jońyshqa shóbi jetkizildi. Aldaǵy kúnderde bul baǵytta 518 tonna jońyshqaǵa tapsyrys berilgen. Sondai-aq, aýdandaǵy birqatar sharýashylyqta biyl jońyshqa kólemin arttyrýǵa nazar aýdaryldy.
Osy oraida aýdan ákimdigi janynan jumysshy toby qurylǵan. Mamandar jaiylymdy sýlandyrý úshin burynǵy sý kózderine túgendeý júrgizgen. Alǵashqy kezekte basty 49 sý uńǵymasynyń deregi naqtylandy. Qujattandyrýmen quzyrly mekemeler tarapynan shara qabyldanýda. Negizgi maqsat – eldi mekenderdegi sý uńǵymalaryn qaita qazyp, sýlandyrý máselesin sheshý.
Qýańshylyq saldarynan keibir sharýalar tórt túlik basyn azaitýdan ózge amaly qalǵan joq. Olardyń qatarynda Qulandy, Belaran, Mergensai aýyldarynyń turǵyndary bar. Jergilikti jurt jylqy, siyr jáne qoiyn naryq baǵasynan tómen satýǵa májbúr.
«2000 jyly shyqqan «Saqtandyrý qyzmeti týraly» zańy bar. Atalǵan zańǵa sáikes barlyq zańdy jáne jeke tulǵalar óz menshigindegi múlikti saqtandyrýǵa quqyly. Aral aýdanynda maldary shyǵyn bolǵan sharýalar osyndai talaptarǵa sai jumys jasaǵan bolsa, olar saqtandyrý kompaniiasynan ótemaqy talap ete alady. Qazirgi tańda aýdan ákimdigi tarapynan sol óńirdegi qýańshylyqqa qatysty tótenshe jaǵdai jariialaý máselesi qaralýda», – dedi oblystyq aýyl sharýashylyǵy basqarmasy basshysynyń orynbasary Ainur Tileýleeva.
