Qyzylorda oblysy Aral aýdanynda qýańshylyqqa bailanysty tótenshe jaǵdai jariialaýǵa qatysty qujattar ázirlenýde. Qazir tek topyraqtyń quramyn anyqtaý qaldy, dep habarlaidy "Ult aqparat".
Búginde ulttyq saraptama ortalyǵy zertteý jumystaryn júrgizýde. Qys-kóktem mezgilderinde qar men jaýyn-shashyn mólsheriniń az bolýyna bailanysty Aral aýdanynda qýańshylyq jaǵdai tirkeldi.
Mal sany men azyǵynyń balansyn ustap turý baǵytynda jumys istelip jatyr. Aýyl turǵyndary, eriktiler jáne aýdandyq tótenshe jaǵdailar bóliminiń qyzmetkerleri tarapynan kezekshilik uiymdastyrylǵan. Qazir maldyń qyrylýy toqtady.
Eske salsaq, budan buryn Aral aýdanynda qýańshylyqtan 481 mal qyrylǵanyn habarlaǵan edik.
«Shóptiń shyǵymdylyǵyna qatysty aýdandy úsh sanatqa bóldik. Iaǵni, qyzyl, jasyl, sary. Qyzyl aimaqqa 13 eldi mekendi jatqyzdyq. Óitkeni, jaiylymdyq jerleri 90 paiyzǵa qurǵap qalǵan. Al sary aimaqtaǵy eldi mekenderde 30-40 paiyzdy quraityn shóp bar. Jasyl túspen belgilengen eldi mekenderde shóptiń shyǵymdylyǵy jaqsy. Qazir ár aimaqtan 500 gramm topyraq alynyp, saraptamaǵa ótkizdik. Shóptiń shyǵýyna áser etetin mineraldardyń topyraqtyń quramynda bar-joǵy anyqtalady. Qorytyndysyn tótenshe jaǵdailar departamentine ótkizip, kelisim alamyz. Sodan keiin baryp tótenshe jaǵdai jariialaimyz. Bul másele kúndelikti baqylaýda», - dedi Aral aýdany ákiminiń orynbasary Erkin Ábishev.
