Foto: championat.com
2028 jylǵy Los-Andjeles Olimpiadasyna daiyndyq aiasynda qazaqstandyq sportshylarǵa Halyqaralyq Olimpiada komitetiniń stipendiialyq baǵdarlamasy boiynsha alǵashqy tólemder aýdaryldy. Baǵdarlama sheńberinde árbir atletke 2500 AQSh dollary, iaǵni shamamen 1,2 million teńge kóleminde qarjylai qoldaý berildi, dep habarlaidy Ult.kz.
Bul stipendiia sportshylardyń Olimpiadaǵa irikteý kezeńi men daiyndyq protsesin tiimdi uiymdastyrýǵa baǵyttalǵan. Qazaqstandyq atletterdiń baǵdarlamaǵa qatysýyna Qazaqstan Ulttyq Olimpiadalyq komiteti bastamashy boldy. UOK ulttyq federatsiialarmen jáne Halyqaralyq Olimpiada komitetimen birlesip, ótinim berý protsesin tolyq úilestirgen.
Stipendiia 2028 jylǵy Olimpiada oiyndarynyń baǵdarlamasyna engen jeke sport túrleri boiynsha synǵa túsetin sportshylarǵa beriledi. Irikteý barysynda úmitkerlerdiń sporttyq nátijeleri, Olimpiada joldamasyn jeńip alý múmkindigi jáne joǵary jetistik kórsetý áleýeti negizgi kriteriiler retinde qarastyryldy. Sonymen qatar, dopingke qatysty tártip buzýshylyqtardyń bolmaýy jáne Olimpiadalyq hartiia talaptaryn saqtaý da mańyzdy talaptardyń biri boldy.
Bólingen qarajat oqý-jattyǵý jiyndaryn ótkizýge, jeke daiyndyqty jetildirýge, jattyqtyrýshylar men mamandardyń eńbekaqysyn tóleýge, meditsinalyq jáne ǵylymi qyzmetterge, saqtandyrýǵa, sondai-aq turý jáne tamaqtaný shyǵyndaryn óteýge jumsalýy múmkin. Qarajattyń jumsalýy belgilengen tártipke sáikes turaqty túrde baqylaýǵa alynady.
Ulttyq Olimpiadalyq komitettiń málimetinshe, bul stipendiia sportshylarǵa daiyndyq josparyn júieli túrde quryp, irikteý jarystaryna sapaly daiyndalýǵa múmkindik beredi. Nátijesinde olar óz maqsattaryna jetip, joǵary kórsetkish kórsetýge múmkindik alady.
Stipendiia iegerleri qatarynda kelesi qazaqstandyq sportshylar bar:
Aida Ábikeeva (boks), Saǵyndyq Toǵambai (boks), Ǵusman Qyrǵyzbaev (dziýdo), Ábiba Ábýjaqynova (dziýdo), Milad Karimi (sporttyq gimnastika), Rýslan Kýrbanov (semserlesý), Ishar Kýrbaev (grek-rim kúresi), Rizabek Aitmuhan (erkin kúres), Zeinep Baianova (áielder kúresi), Mariia Brovkova (baidarka jáne kanoede eskek esý), Aleksandra Le (nysana kózdeý), Islam Sátpaev (nysana kózdeý), Ámir Maimuratov (sporttyq quzǵa órmeleý), Batyrhan Tóleýǵali (taekvondo), Alan Qurmanǵaliev (ústel tennisi), Elizaveta Matveeva (jeńil atletika), Ásem Orynbai (stend atý), Sergei Petrovich (aýyr atletika), Arai Nurlybekova (aýyr atletika), Danil Mýsabaev (batýttaǵy gimnastika).
Atalǵan stipendiialyq baǵdarlama sportshylarǵa qosymsha múmkindik berip, olardyń Olimpiadaǵa irikteýden sátti ótip, joǵary nátijelerge qol jetkizýine jaǵdai jasaidy.
