Aqtóbede kámeletke tolmaǵan mektep oqýshysyna zorlyq jasady degen kúdikpen 22 jastaǵy jigit ustaldy. Qazirgi ýaqytta kúdikti ýaqytsha ustaý izoliatoryna qamalyp, oqiǵanyń mán-jaiy boiynsha sotqa deiingi tergeý júrgizilip jatyr, dep habarlaidy ult.kz.
Jábirlenýshiniń ápkesi Aqmaral Ájǵalievanyń aitýynsha, oqiǵa biyl mamyr aiynda bolǵan. Onyń sózinshe, sińlisi qurbysynyń úiine barǵannan keiin úiine qaitpaq bolǵan sátte qurbysynyń aǵasy ony jibermei, zorlyq kórsetken.
Oqiǵadan keiin mektep oqýshysynyń psihologiialyq jaǵdaiy kúrt ózgergen. Ol eshkimmen sóilespei, tamaq ishpei, tuiyqtalyp ketken. Bolǵan jaitty bir aiǵa jýyq ýaqyt ótken soń ǵana ata-anasy men aǵasyna aityp bergen. Jábirlenýshiniń týystarynyń aitýynsha, buǵan kúdiktiniń qorqytyp-úrkitýi sebep bolǵan.
– Sińlim buryn ashyq-jarqyn edi. Qazir qap-qara túnekke túskendei kúi keship júr. Eshkimmen sóilespeidi, durys tamaq ta ishpeidi. Ol qoryqqandyqtan bizge birden eshteńe aitpady. Sebebi álgi jigit óltiremin dep qorqytqan. Biz tek ádil tergeý júrgizilip, kináli adamnyń zań aldynda jaýap bergenin qalaimyz, – dedi Aqmaral Ájǵalieva.
Aqtóbe oblystyq politsiia departamentiniń málimetinshe, atalǵan fakti boiynsha qylmystyq is qozǵalyp, keshendi tergeý amaldary júrgizilip jatyr.
– Kúdikti ustalyp, ýaqytsha ustaý izoliatoryna qamaldy. Qazirgi ýaqytta istiń barlyq mán-jaiyn anyqtaýǵa baǵyttalǵan tergeý áreketteri júrgizilýde, – dep habarlady vedomstvonyń baspasóz qyzmeti.
Tergeý jalǵasyp jatyr. Zańnamaǵa sáikes, kúdiktiniń kinási sot úkimi zańdy kúshine engenge deiin dáleldengen bolyp sanalmaidy.
