Aqmola oblysynda 23 jańa týǵan nárestege memleket esebinen berilýi tiis «Ana men bala» jinaqtary ýaqytynda tabystalmaǵan. Bul zań buzýshylyqty aýdandyq prokýratýra anyqtady, dep habarlaidy ult.kz.
Prokýratýranyń málimetinshe, Astrahan aýdandyq prokýratýrasy densaýlyq saqtaý salasyndaǵy zań talaptarynyń saqtalýyn tekserý barysynda aýdandyq aýrýhananyń kepildendirilgen tegin meditsinalyq kómek aiasynda qarastyrylǵan «Ana men bala» jinaqtaryn 23 sábige der kezinde bermegeni belgili bolǵan.
Prokýrorlyq qadaǵalaý aktisinen keiin aýrýhana anyqtalǵan zań buzýshylyqtardy joiý sharalaryn qabyldap, memlekettik satyp alý arqyly 120 dana «Ana men bala» jinaǵyn satyp alǵan.
Nátijesinde 23 náresteniń quqyǵy qalpyna keltirilip, biyl dúniege keletin sábilerdi qajetti jinaqtarmen qamtamasyz etý úshin jetkilikti qor jasaqtalǵan.
Prokýratýra azamattardyń áleýmettik mańyzy bar salalardaǵy quqyqtaryn qorǵaý jumystary turaqty baqylaýda ekenin málimdedi.
