Biyl dástúrli ÁMEN halyqaralyq animatsiialyq filmder kinofestivali Túrkistan qalasynda ótedi, dep habarlaidy QazAqparat.
29-30 qazan kúnderi úshinshi ret uiymdastyrylatyn halyqaralyq sharaǵa otandyq jáne baýyrlas túrki elderdiń, atap aitqanda Túrkiia, Ázerbaijan, Bashqurtstan, Qyrǵyzstan, Ózbekstan, Tatarstan men Tájikstannyń bilikti mýltiplikatorlary qatysady.
«Baiqaýǵa animatsiia salasynda belgili mamandardan qurylǵan halyqaralyq qazylar alqasy tórelik etedi. Jeńimpazdar birneshe nominatsiia boiynsha marapattalady. Odan bólek, festival aiasynda sheteldik ozyq mýltiplikatorlardyń sheberlik synyptary men treningteri josparlanǵan. Qatysýshylar álemge tanymal 4 mamannyń dárisin tyńdap, kásibi sheberligin shyńdaýǵa múmkindik alady.
Sondai-aq, festival qonaqtary Qazaqstannyń úzdik animatsiialyq kinostýdiialary kórmesin tamashalaidy. Onda kinostýdiialar animatsiia jasaýdyń qyr-syry men erekshelikterin kórsetip, jas mamandar úshin tájiribe almasý alańyn uiymdastyrady», - dep habarlady festival uiymdastyrýshylary.
Baǵdarlama boiynsha, festivaldiń ekinshi kúni túrki elderindegi kino óneriniń damý baǵyttaryna, búgini men erteńine arnalǵan dóńgelek ústel ótedi. Sheteldik jáne otandyq animatsiia salasynyń mamandary ózara bailanys ornatyp qana qoimai, ózekti taqyryptarda pikir almasyp, túrkitildes elderdiń animatsiia salasyndaǵy yntymaqtastyǵyna jańa serpin bermek.
«Qazaqstan Táýelsizdiginiń 30 jyldyǵyna orailastyrylǵan festivaldiń biyl Túrki dúniesiniń rýhani astanasy – Túrkistan qalasynda ótýi de airyqsha mánge ie. Uiymdastyrýshylar shahar turǵyndary men qonaqtaryna mereitoi qarsańynda airyqsha syi jasamaq. Túrkistandyqtar eki kún qatarynan qaladaǵy eń úzdik kinozaldardan elimizdiń jáne túrki elderiniń eń úzdik animatsiialyq filmderin tegin tamashalaidy», - deidi uiymdastyrýshylar.
Aita keteiik, dástúrli festivaldi OzgeEpic zamanaýi óner keńistigi men Qazaqstan animatsiialyq kinostýdiialar qaýymdastyǵy Aqparat jáne qoǵamdyq damý ministrliginiń qoldaýymen uiymdastyrady.
