Búgin Almaty oblysynda 50 myń oqýshy mektep tabaldyryǵyn attap, kúmis qońyraý syńǵyryn estidi. Oblys ákimi Amandyq Batalov Taldyqorǵan qalasyndaǵy ótken jyly ashylǵan 1200 oryndyq №28 IT-mektep-litseidiń pedagogikalyq ujymyn, oqýshylar men ata-analardy Bilim kúnimen quttyqtap, onynshy synyp oqýshylarynyń mamandyq tańdaýǵa arnalǵan sabaǵyna qatysty.
- Búgin erekshe mereke – Bilim kúni. Biz bul kúnge árqashan daiyndyqpen kelemiz. Jańa mektepter salamyz, kúrdeli jóndeý júrgizemiz, materialdyq-tehnikalyq bazany jańalaimyz. Jyl saiyn mektepke baratyn balalardyń sany artyp kele jatqany bizdi qýantady. Biylǵy jyldyń ózinde osy mektepte 10 birinshi synyp qabyldanǵan. Sondyqtan barlyq máselelerdi, sonyń ishinde úsh aýysymda oqytý máselesin de kezeń-kezeńimen sheship kelemiz. Barlyǵyńyzdy jańa oqý jylynyń bastalýymen quttyqtaimyn, oqýda tabys tileimin, - dedi balalardyń aldynda sóilegen A. Batalov.
Saltanatty sharada mektep direktory Gúljanat Espanova quttyqtaý tilegin bildirdi. Sol siiaqty birinshi synyp oqýshylary da taqpaq aityp, án salyp, bi bilep, ónerlerin kórsetti. Atap ótsek, atalǵan mektepke biylǵy jyly 10 birinshi synyp, iaǵni 291 bala qabyldanǵan.
Saltanatty jiynnan keiin qonaqtar oblys ákimi A. Batalovpen birge birinshi synyptardyń synyp saǵatyna qatysyp, IT-synyptyń jumysymen de tanysty. Sonymen birge Amandyq Batalov onynshy synyp oqýshylarymen júzdesip, jasóspirimderdiń mamandyq tańdaý, tabysqa jetý, óskeleń urpaqtyń tárbiesi týraly suraqtaryna jaýap berdi.
Balalarmen áńgimesinde Amandyq Batalov jetistikke jetý mamandyq tańdaýǵa bailanysty emes, mamandyǵyńa degen óz kózqarasyńa bailanysty ekenin atap ótti:
- Elimizde jasalyp otyrǵan jaǵdailardyń nátijesinde senderdiń joldaryń ashyq, barlyq múmkindik bar. Ózderińdi qyzyqtyratyn qalaǵan mamandyqty tańdai alasyńdar. Tańdaǵan mamandyqta tabysqa jetý eń aldymen alǵan bilimderińniń sapasy men eńbekke degen kózqarastaryńa bailanysty. Kez kelgen kásipke jaýapkershilik, adaldyq, eńbekqorlyq kerek, óz elińdi qurmettep, jaqsy kóre bilý qajet, sonda ǵana tabysqa jetýdiń kiltin taba alasyńdar. Qazir sender sý jańa, keremet mektepte oqyp júrsińder, jalqaýlanbańdar, zeiindi, talapty bolyńdar. Senderdiń árqaisylaryń da ómirden óz oryndaryńdy tabatyndaryńa jáne sol jetistikterge bárimiz birge qýanatynymyzǵa senimdimin, - dedi oblys ákimi.
Paidaly keńesteri úshin rahmet aityp, oqýshylar oblys basshysymen birge estelik sýretke tústi.
Atap ótsek, Bilim kúninde úsh aýysymda oqytatyn mektepterdi boldyrmaý maqsatynda 5 mektep iske qosyldy, sonyń ishinde japsarjai, 1800 oryndyq Qarasai, Ile, Talǵar aýdandaryndaǵy mektepter bar. Jyl sońyna deiin Kóksý jáne Kerbulaq aýdandarynda 200 oryndyq 2 mektep paidalanýǵa beriledi dep josparlanǵan. Bilim salasynyń 31 nysanyna kúrdeli, 740 mektepke aǵymdaǵy jóndeý jumystary júrgizilgen.
Almaty oblysy ákiminiń baspasóz qyzmeti
