Almaty oblysynyń ákimi Amandyq Batalov frontaldy júk tiegishtiń kúregine otyryp alǵan áieldiń videosyna qatysty túsinik berdi, dep habarlaidy QazAqparat.
«Saryózekte áiel adamnyń júk tiegishtiń kúregine minip alǵan videoǵa toqtalsam, keiinnen bul jaǵdaidy «Almaty oblysynda kómir tapshylyǵynan adamdar osyndaiǵa baryp jatyr» dep taratty. Osy oqiǵanyń mán-jaiyn egjei-tegjeili anyqtadym. Atalǵan áiel ol jerde burynnan jumys isteidi eken, biznespen ainalysady. Onyń úsh júk kóligi bar jáne sol jerden alǵan kómirge aqshany ústemelep qosyp, turǵyndarǵa qaita satady», - dedi Batalov Ortalyq kommýnikatsiialar qyzmetinde.
Osy oraida ol salyq organdary men politsiiaǵa tiisti tapsyrma bergenin aitty. Olar kómirdi alyp-satýmen ainalasyp, osylai tabys jasap júr.
«Nátijesinde, kómir tapshy dep kórsetti. Sol kúni bizde 10 vagon júkti túsirýge keldi, al 20-sy jaqyndap qalǵan edi. Bizde ár vagon nómirlengen, ákimdik adamdary ony erekshe baqylaýda ustap tur», - dedi oblys ákimi.
