Mádeniet jáne sport ministri Aqtoty Raiymqulova Joshy jáne Alasha han kesenesinde ǵylymi-restavratsiialaý jumystary júrgizilip jatqanyn málimdedi, dep habarlaidy QazAqparat.
«2019 jyly Ulytaý jerinde Memleket basshysy Qasym-Jomart Kemelulynyń qatysýymen ótken «Jezkiik-2019» halyqaralyq forýmynda qazaq halqy úshin Ulytaýdyń tarihi mánin erekshe atap ótti. Shyńǵys hannyń úlken uly – Joshynyń mazary qazaq jerinde turǵanyn búginde elimizdegi jáne sheteldegi jurtshylyqtyń kóbi bile bermeidi. Onyń tarihi tulǵasyna álemniń nazaryn aýdaryp, kesenesin mádeni týr nysanyna ainaldyrý boiynsha mindet qoidy. Ulytaý – halyqaralyq deńgeidegi etnografiialyq týrizmniń ortalyǵy ainalatynyna senim bildirdi». Osy oraida biylǵy jyly «Ulyq Ulystyń» (Altyn Orda) 750 jyldyǵy aiasynda ǵylymi-zertteý jáne mádeni is-sharalar, tarihi-mádeni mura nysandaryn qalpyna keltirý, etno-mádeni, ekotýrizmdi damytý, týristerdiń qolaily bolýy úshin jaǵdai jasaý jáne Ulytaýǵa kóliktik-logistikalyq infraqurylymyn damytý josparlanyp otyr», - dedi Aqtoty Raiymqulova OKQ alańy arqyly onlain rejimde halyq aldynda esep berý kezdesýinde.
Ministrdiń aitýynsha, qazirgi tańda Joshy jáne Alasha han kesenesinde ǵylymi-restavratsiialaý jumystary júrgizilýde. Ol jerde tarihi-mádeni keshen qurylady. Sondai-aq «Ulytaý» vizit-ortalyǵyn aiaqtaý josparlanýda.
«Ulytaý – Altyn Ordanyń altyn besigine otandyq jáne sheteldik týristerdi tartý maqsatynda «Qasietti Ulytaý», «Han Joly», «Terekti áýlie» jáne «Qorǵasyn qupiiasy» jańa týristik baǵyttary ázirlendi. Mereitoidyń negizgi is-sharalary osy jyldyń qyrkúiek aiyna josparlanyp otyr. Tarihi keshenniń ashylýy, ǵylymi-praktikalyq seminar, «Jezkiik-2020» halyqaralyq festivali sekildi sharalar uiymdastyrylady», - dedi Aqtoty Raiymqulova.
