«Altyn orda» bazarynda aýyr soqqy alyp, 1 aidan keiin kóz jumǵan 23 jastaǵy Qainar Biláldiń ata-anasy ulynyń ólimine Talǵar aýdandyq ortalyq aýrýhanasyn kinálap otyr, dep habarlaidy Almaty.tv.
Jelige tarap, jalpaq jurttyń jaǵasyn ustatqan beinejazbany 14 maýsym kúni «Altyn orda» bazaryndaǵy kýágerler túsirip alǵan. Onda aǵatailap jalynǵan jigit 2 ret aýyr soqqy alǵany anyq kórinedi. Biraq ol kezde Qainar 500 myńnyń telefony úshin baqilyq bolamyn dep oilamaǵan da edi.
«Kómektesetindei eshkim eshteńe túsinbei qaldy. «Aǵatai telefonymdy ber» dep jalynyp jatyr. Onyń qolynda pyshaq boldy ǵoi. Qyzdar kómektesti», – deidi kýáger.
Basyna tigen aýyr soqqydan aýrýhanada kóz jumǵan jas jigitti jaqyndary kúni keshe aqtyq saparǵa attandyrdy. Týystary kisi ólimine sebepker bolǵan kúdiktige qatań jaza qoldanýdy talap etip otyr.
«Altyn ordada» kútken. Eki jigit kelip, kóremin dep uialy telefonyn alǵan. Bermei, urǵan ǵoi», – deidi marqumnyń jary Shynar Dáýletqyzy.
Qaskóidiń qolynan qaza boldy degen Qainardyń qara shańyraǵy qańyrap tur. Qora qopsysyn qalaberdi osy úidiń qara jumysyn arqalaǵan azamattyń artynda anasy men jary qaldy. Marqumnyń anasynyń aitýynsha, 6 kún boiy aýrýhanada jatqan ulyna der kezinde durys em jasalǵanda tiri qalar edi. Ol «Basyndaǵy uiyǵan qandy o basta alyp tastaýǵa bolatyn edi ǵoi» dep qynjylady.
«Talǵardyń dárigerlerine aitar shaǵymym bar. Balamdy durys qaramady. Esiktiń aldyndaǵy itińdi de sylap-sipaisyńdar ǵoi, sonda balam it qurly bolmady ma? Ábden bes-alty kún bolǵannan keiin ózge dárigerge jibergen», – deidi marqumnyń anasy Pátigúl Muzartbekqyzy.
Asyraýshysynan airylǵan ananyń aryzyn estigen aq halattylar 6 kúnde jaǵdaiy qanaǵattandyrarlyq bolǵan soń, oblystyq aýrýhanaǵa jóneltýdi jón sanadyq degen jaýap berdi.
«Kelgen kezde jaǵdaiy ortasha aýyr boldy. Sol jaq bet súiekteriniń synýy diagnozymen jatqyzylǵan. 14 maýsymnan 20 maýsymǵa deiin 6 kún osynda travmotologiiada jatyp, jaǵdaiy qanaǵattandyrarlyq bolǵasyn kelisilip, Oblystyq aýrýhanada ota jasaýǵa aýystyrylǵan», – deidi Talǵar aýdandyq ortalyq aýrýhanasy bas dárigeriniń emdeý isi boiynsha orynbasary Baqyt Jámekov.
Baqyt Jámekovtyń aitýynsha, Talǵardaǵy aýrýhanada ota jasaýǵa sebep bolmaǵan.
«Ota jasaýǵa sol kezde kórsetkish bolǵan joq. Birinshiden men ondai eshqandai pikir bere almaimyn. Ony bizge beretin quzyrly organdar bar, sýd meditsinalyq ekspertiza bar», – deidi Talǵar aýdandyq ortalyq aýrýhanasy bas dárigeriniń emdeý isi boiynsha orynbasary Baqyt Jámekov.
Al aýyr soqqyǵa jyǵyp óltirdi dep kúdikke ilingen Jambyl oblysynyń 28 jastaǵy azamaty qamaýǵa alyndy. Almaty oblystyq politsiia departamentiniń dereginshe, ol jedel izdestirý jumystarynyń nátijesinde ustalǵan. Marqumnyń otbasy quzyrly organdar isti ádil tergese eken deidi.
