Almaty qalasynyń ákimi Baqytjan Saǵyntaevtyń ókimimen Qamaljan Talǵatuly Nadyrov Qoǵamdyq densaýlyq saqtaý basqarmasynyń basshysy laýazymyna taǵaiyndaldy, dep habarlaidy "Ult aqparat".
Kamaljan Nadyrov osy ýaqytqa deiin QR Densaýlyq saqtaý vitse-ministri qyzmetin atqardy.
Kamaljan Nadyrov 1983 jyly 27 aqpanda dúniege kelgen. Eki joǵary bilimi bar: S.J. Asfendiiarov atyndaǵy Qazaq Ulttyq meditsina ýniversitetin emdeý isi mamandyǵy boiynsha, Turan ýniversitetin – ekonomist mamandyǵy boiynsha támamdaǵan. Qoǵamdyq densaýlyq saqtaý magistri. Sondai-aq, Nazarbaev Ýniversitetiniń Joǵary biznes mektebin (Execuitive MBA) bitirgen, «The Fuqua School of Business» Duke University-de (AQSh), «Parkway College» (Singapýr) oqý oryndarynda bilim alǵan.
Eńbek jolyn 2007 jyly intern-dáriger, klinikalyq ordinator, bólim meńgerýshisi, B.O. Jarbosynov atyndaǵy «Ýrologiia ǵylymi ortalyǵy» bas direktorynyń orynbasary bolyp bastady.
2014 jyldan bastap Densaýlyq saqtaý ministrligi Meditsinalyq qyzmetterdi standarttaý departamenti direktorynyń orynbasary qyzmetin atqardy. 2015-2017 jyldary «Respýblikalyq diagnostikalyq ortalyq» («University Medical Center») direktory boldy.
2017-2019 jyldary Astana qalasy Qoǵamdyq densaýlyq basqarmasynyń basshysy boldy.
2019 jylǵy naýryzda Qazaqstan Respýblikasynyń Densaýlyq saqtaý vitse-ministri qyzmetine taǵaiyndaldy.
Esterińizge sala keteiik, buǵan deiin QR Densaýlyq saqtaý ministri Eljan Birtanov Almaty qalasynyń densaýlyq saqtaý júiesindegi kúrdeli jaǵdaiǵa bailanysty, atalǵan laýazymǵa tájiribeli qyzmetkerlerdi – densaýlyq saqtaý vitse-ministri bolǵan Kamaljan Nadyrovty Qoǵamdyq densaýlyq basqarmasynyń basshysy laýazymyna jáne Almaty qalasynyń bas sanitarlyq dárigeri laýazymyna Jandarbek Bekshindi jiberý týraly sheshim qabyldanǵanyn habarlaǵan bolatyn.
