Almatyda shomylýǵa ruqsat etilgen oryndar belgilendi, dep habarlaidy "Ult aqparat".
Almaty qalasy tótenshe jaǵdailar departamenti bastyǵynyń orynbasary Erlan Álibekovtyń aitýynsha, qala aýmaǵynan 28 shaǵyn ózen aǵyp ótedi, sonymen qatar qala ishinde 26 sý qoimasy bar.
Megapoliste shomylýǵa ruqsat etilgen 4 oryn belgilendi.
Olar:
1. D. Qonaev atyndaǵy Úlken Almaty kanaly – Baým toǵaiy;
2. D. Qonaev atyndaǵy Úlken Almaty kanaly – Gúlder demalys aimaǵy;
3. Sairan kóli – Tóle bi kóshesinen ońtústik baǵytta 300 metr;
4. Sairan kóli – Tóle bi kóshesinen pirske deiin ońtústik baǵytta 300 metr.
Onlain brifing barysynda Erlan Álibekov «jabaiy» jaǵajailarda shomylý keleńsiz jaǵdailarǵa ákelýi múmkin ekenin eskertti.
Sonymen qatar, ol ata-analardan jazǵy demalys kezinde balalardyń qaýipsizdigine nazar aýdarýdy surady.
«Biyl bir adam sýǵa ketti. Tájiribe men baqylaý nátijesi kórsetkendei, qaiǵyly oqiǵalar adamdardyń tiisti tártip erejelerin buzýynan oryn alýda. Ótken jyly júrgizilgen profilaktikalyq is-sharalardyń arqasynda sýda adam ólimi tirkelgen joq, alaida Sairan kólinde qutqarýshylar 4 adamdy qutqardy», - deidi Erlan Álibekov.
Biyl Tótenshe jaǵdailar departamentiniń qyzmetkerleri aýdan ákimdikterimen birlesip shomylýǵa tyiym salynǵan jerlerde 58 belgi ornatty.
Al Sairan kólinde «Sýdaǵy qaýipsizdik sharalary men erejeleri týraly» bilbord ornalastyryldy.
Departament ókili biylǵy jazda Almaty sý aidyndarynda qutqarýshylar, sýda qutqarý otriadynyń jáne politsiia qyzmetkerleriniń, QR Ulttyq ulanynyń № 5571 «Ońtústik» bóliminiń áskeri qyzmetshileri kún saiyn kezekshilik etetinin málim etti.
«Demalys kúnderi bul jumys kúsheitilgen rejimde ótedi. Tártip buzýshylar ákimshilik jaýapkershilikke tartylady. Mysaly, ótken jyly belgilenbegen oryndarda shomylǵany úshin 6 adamǵa aiyppul salyndy. Sondyqtan ruqsat etilgen jerlerde ǵana shomylyńyz, jaǵalaýdan jáne qorshaý belgilerinen alys júzbeńiz. Eger siz ruqsat etilgen jerde shomylsańyz, belden joǵary sýǵa kirmeńiz. Balalardy qaraýsyz qaldyrmańyz. Qaiyqtardan, kópirlerden jáne ailaqtardan sýǵa sekirmeńiz. Túngi ýaqytta jáne mas kúide shomylmańyzdar», - deidi Almaty TJD basshysynyń orynbasary.
Eske salaiyq, qutqarý qyzmetiniń biryńǵai telefony – 112.
