Bostandyq aýdanynda Radostovets kóshesindegi №292 úidiń qarsy betinde, Dýnaevskii kóshesiniń boiynda ornalasqan jańa «SHUAQ» qoǵamdyq keńistigin abattandyrý jobasy júzege asyrylyp jatyr, dep habarlaidy ult.kz.
Óńirlik kommýnikatsiialar qyzmeti uiymdastyrǵan baspasóz týrynda aýdan ákiminiń orynbasary Miras Zeinoldin jýrnalisterge jobany tanystyryp, onyń iske asyrylý barysy týraly baiandady.
Nysannyń qurylysy biylǵy 10 maýsymda bastaldy. Jumystardy qyrkúiek aiynda aiaqtaý josparlanyp otyr. Aita keteiik, joba jergilikti biýdjetten qarjy bólinbei, tolyqtai demeýshilerdiń qarajaty esebinen júzege asyrylýda.
«Jobanyń jalpy uzyndyǵy – 550 metr. Munda zamanaýi qoǵamdyq keńistikter salynyp, keshendi kógaldandyrý jumystary júrgiziledi. Ulttyq oiý-órnek elementterimen bezendirilgen shaǵyn sáýlet nysandary, avtomatty sýarý júiesi, syrtqy jaryqtandyrý jáne turǵyndardyń demalýyna arnalǵan oryndar ornatylady», – dedi Miras Zeinoldin.
Joba aýmaqty keshendi abattandyrýdy kózdeidi. Munda granit, rezeńke jáne asfaltbeton jabyndysy tóselgen jaiaý júrginshiler joldary men qoǵamdyq keńistikter salynyp, aýqymdy kógaldandyrý jumystary júrgiziledi. Sonymen qatar, zamanaýi shaǵyn sáýlet nysandary, bastyrmalar, syrtqy jaryqtandyrý júiesi, balalar oiyn jáne sport alańdary, sondai-aq sýburqaq ornatylady. Joba aiasynda shamamen 4 myń sharshy metr aýmaqty kógaldandyrý josparlanǵan.
Aýdan ákimi orynbasarynyń aitýynsha, buǵan deiin bul aýmaq qaraýsyz qalyp, turǵyndar úshin qolaisyz ári qaýipsizdigi tómen jer bolǵan. Abattandyrý jumystary aiaqtalǵannan keiin munda serýendeýge, sportpen ainalysýǵa jáne otbasylyq demalysqa arnalǵan zamanaýi qoǵamdyq keńistik paida bolady.
«Biyl aýdan ákimdigi biznestiń áleýmettik jaýapkershiligi aiasynda 20 abattandyrý jobasyn júzege asyrýdy josparlap otyr. Bul buryn paidalanylmai kelgen qalalyq aýmaqtardy retke keltirip, turǵyndar úshin jańa jaily qoǵamdyq keńistikter qalyptastyrýǵa múmkindik beredi», – dep atap ótti Miras Zeinoldin.
Qazirgi ýaqytta nysanda bekitilgen eskizdik jobaǵa sáikes qurylys-montaj jumystary júrgizilýde. Qurylys aiaqtalǵannan keiin jańa qoǵamdyq keńistik aýdan turǵyndarynyń demalysyna, serýendeýine, sportpen shuǵyldanýyna jáne otbasylyq ýaqyt ótkizýine arnalǵan zamanaýi ári tartymdy orynǵa ainalady.
