Bazardaǵy órtti sóndirýge QR IIM Tótenshe jaǵdailar komitetiniń aviatsiiasy kóterildi, dep habarlaidy "Ult aqparat".
Almaty qalalyq Tótenshe jaǵdailar departamentiniń habarlaýynsha, oqiǵa ornynda jeke quramnyń 64 qyzmetkeri, 20 tehnika men «Almaty tazalyq» kásipornynyń sýarýshy jáne Jasyl ekonomika basqarmasynyń 15 sý tasymaldaityn kólikteri tartyldy. «Qazaviaqutqarý» AQ-nyń KA-32 jáne PD 13 tehnikasy jumyldyryldy.
«Bul órttiń «Mizam» bazaryna qatysy joq, bazarlardyń arasynda kóterme saqtaý qoimalarynyń jeke aýmaǵy bar. Sol konteinerler janyp jatyr. Qyzyl jalynnyń qoimalardyń ońtústik jaǵyna taralý qaýipi saqtalyp otyr. Sondyqtan temperatýra joǵary, ázirge órt sharpyǵan aýdandy anyqtaý múmkin emes», - dep habarlady TJM.
Al, jeke kásipker Janat Álmaǵambetovtiń aitýynsha, qoimalarda tez janatyn taýarlar bar.
«Men jumys ornyma juma namazdan keiin, saǵat 14:00-de keldim. Sol kezde «Mizam» bazarynyń qoimasynan shyqqan órtti kórdim. Kórshilerime kómektesý úshin áriptesterime, balalaryma telefon soǵyp, osy qoimalardy bosatyp aldym. Munda negizinen dúngender jumys isteidi. Olarǵa taýarlardy shyǵarýǵa kómektestik. Biz taýarlardyń az ǵana bóligin shyǵaryp aldyq, sebebi olar aýyr boldy. Munda tez janatyn qurylys materialdary, shinalar, sómkeler bar. Órttiń shyqqan sebebin bilmeimin. Bizge áli habarlaǵan joq», - dedi kásipkerlerdiń biri Janat Álmaǵambetov.
