Almatynyń ál-Farabi dańǵylynda saǵatyna 80 shaqyrym jyldamdyqpen júrýge qaita ruqsat etildi, dep habarlaidy "Ult aqparat".
Qala biliginen málim etkendei, turǵyndardan avtojoldarǵa qatysty kóptegen usynystar túsedi. Ásirese, ál-Farabi dańǵylynda 80 km/saǵatpen júrýge qaita ruqsat berý ótinishteri bar.
Almaty ákimdiginen atap ótkendei, «is júzinde qala ákimshiligi qoǵamdyq qysymda qalyp otyr».
Ál-Farabi dańǵyly men Shyǵys ainalma joly - bul qalanyń negizgi tranzittik magistraldary. Shet memleketterdiń tájiribesi jyldamdyqty shekteý ortalyq kóshelerge kóbirek qoldanylatynyn kórsetedi, dedi jergilikti atqarýshy organnan.
«Tájiribe kórsetkendei, ruqsat etilgen jyldamdyqty 60 km/saǵatqa deiin tómendetkenimen, apatty jaǵdai qalada jaqsarǵan joq. Ókinishke orai, jol-kólik oqiǵalarynyń sany artý ústinde», - deidi ákimdiktegiler.
Shyǵys ainalma joly men ál-Farabi dańǵylyna burynǵy jyldamdyq rejimin qaitarýdy Almaty qalasynyń Qoǵamdyq keńesi de usynǵan bolatyn.
«Sondyqtan, qoǵam tarapynan túsken kóp ótinishti nazarǵa ala otyryp, Almaty ákimdigi Shyǵys ainalma joly men ál- Farabi dańǵylyna ruqsat etilgen 80 km/saǵat jyldamdyqty qaitarý jóninde sheshim qabyldaidy. Bul biryńǵai ainalma jolyna enetin kóshelerge qatysty oń shara bolyp tabylady», - delingen habarlamada.
