Almatylyq atqysh Igor Dýjnovqa toǵyz ret elden shyǵýǵa tyiym salynǵan. Bul aqparat Boryshkerlerdiń biryńǵai tiziliminde kórsetilgen, - dep habarlaidy Tengrinews.kz agenttigi.
Ashyq aqparat kózderinde Igor Dýjnovqa shetelge shyǵýǵa 2014 jyldyń sáýirinde birinshi ret tyiym salynǵanyn kórýge bolady. Oǵan "Nano-Pliýs" kompaniiasynyń "Qostanai-Kama" kompaniiasyna 2,6 million teńge kóleminde tólenbegen qaryz sebep bolǵan. Ekinshi ret oǵan 2014 jyldyń shildesinde elden shyǵýǵa shekteý qoiylǵan. Mundai sheshimge Dýjnovtyń Rafail Haibýllinge 1,7 million teńgeni qaitarmaýy sebep bolǵan.
Ári qarai, oǵan 2014 jyldyń tamyzynda "Bank Tsentr Kreditke" 121 million teńge qaryzyn tólemegendikten tyiym salynǵan. Dýjnovtan basqa, onyń áieli Anaid Demirchian, sondai-aq eki kompaniia "Nano-Pliýs" jáne "Ideal Servis" boryshker boldy. Tórtinshi ret oǵan 2014 jyldyń qazanynda "Nano-Pliýs" kompaniiasynyń "Kostanai-Kama" kompaniiasyna joǵaryda atalǵan qaryzy boiynsha shekteý qoiylǵan.
Odan ári, 2015 jyldyń naýryzynda sot Var TechAuto-ǵa 5,7 million teńge qaryzdy uzaq ýaqyt boiy qaitarmaǵany úshin Igor Dýjnovqa shekteý qoidy. Al 2016 jyldyń naýryzynda almatylyq atqyshqa "Bank TsentrKreditke" qaryz bolǵandyqtan ketýge taǵy da tyiym salyndy.
Osydan keiin Dýjnovqa 2017 jyly maýsymda taǵy shekteý qoiylǵan. Bul joly ol Olga Vinokýrovaǵa 5,1 million teńge qaryzyn uzaq ýaqyt boiy tólemei kelgen. Keiin 2018 jyldyń shildesinde, "Bank TsentrKredit" 121 million teńge qaryzy boiynsha oǵan Qazaqstannan segizinshi ret shyǵýǵa tyiym salǵan. Al sońǵy ret almatylyq atqysh 2019 jyldyń naýryzynda BTsK nesiesi boiynsha shekteý aldy.
Tengrinews.kz tilshisi Igor Dýjnov qaryz alǵan adamdardyń birimen habarlasty. Ol - Elena Vinokýrova, Olga Vinokýrovanyń qyzy. Áielder almatylyq atqyshtyń otbasyn uzaq jyldar boiy biletinin aitty.
"Anaidtyń ákesi men ákem dos boldy, otbasylarymyz bir-birimen tyǵyz qarym-qatynasta boldy. Bastapqyda Anaid kásipkerlikpen ainalysqan - ol Car City-de avtokólik dóńgelekterin satqan. Al Igor oǵan kómektesetin. Bir jyl ishinde kóptegen tanysynan qaryzǵa aqsha alyp, taýardyń úlken partiiasyn satyp alyp, jaqsy tabys aldy. Ol qaryzdy tólep qana qoimai, bárine alǵysyn bildirdi. 15 jyl buryn bul otbasynyń bedeli óte jaqsy edi.
Alaida keiin, 2008 jyly sulýlyq salonyn ashyp, osy salaǵa ketti. Igor dóńgelek biznesimen ainalysty, al onyń isi keri ketti. Bir jyldan keiin ol bárinen qaryz ala bastady. Ol meniń anamnan páterdi satýdan túsken 35 myń eýro qaryz alǵan. Aqshany oǵan 2009-2012 jyldar aralyǵynda birneshe transhpen bergen", - dedi ol.
2016 jyly Elena Vinokýrova qaterli isikpen aýyryp qalǵan, sondyqtan ony emdeýge aqsha kerek bolǵan. Dál sol kezde ol anasynyń bank shotynda aqsha joq ekenin bilgen.
"Anama kómektesemin dep ýáde bergen eken. Biraq ol osy ýaqyt ishinde anama 200 dollar ǵana bergen. Men aqshany qaitaryp alýǵa barǵanymda, ol ózgerip shyǵa keldi. Buryn sypaiy jáne tynysh adam bolsa, 2016 jyly maqtanshaq jáne dóreki bolyp shyǵa keldi. Ol Donbassta bolǵanyn aityp, meni shyǵaryp saldy. Sóitip men ony sotqa berdim. Nátijesinde sot bes million teńgeni ǵana qaitarýǵa sheshim shyǵardy", - dep qosty almatylyq áiel.
Buǵan deiin sot ol qaryz alǵan adamdar Dýjnovqa qarsy alty ret sotqa shaǵym túsirgenin habarlaǵan. Sondai-aq, 18 ret jeke sot oryndaýshylary ony jaýapker retinde sotqa shaqyrǵan.
Esterińizge sala keteiik, jantúrshigerlik oqiǵa 20 qyrkúiekte keshke bolǵan. Shamamen saǵat 17.20 shamasynda Aqbulaq móltekaýdanyndaǵy úi iesiniń biri ańshy myltyǵynan oq atqan. Kýágerlerdiń aitýynsha, atys bir minýt ishinde bolǵan.
Almatylyq atqysh bes adamdy óltirdi. Qaza bolǵandar arasynda eki politsiia qyzmetkeri, sot oryndaýshysy, sondai-aq úidiń jańa iesi men kýáger bar.
Keiin politseiler bes adamdy atyp óltirgen kúdiktini ustady. Ol - 1997 jyldan beri osy jerde turatyn 54 jastaǵy úidiń qazirgi iesi. Eger onyń kinási dáleldense, er adam 20 jylǵa nemese ómir boiyna deiin bas bostandyǵynan aiyrylýy múmkin.
Keiin úige qatysty daý nesie tólemegendikten týyndaǵany belgili boldy. Úi bankke kepilge alynǵan. Sodan soń úi bank menshigine ótip, odan keiin jeke adamǵa satylǵan. Jeke sot oryndaýshylar palatasy boryshkerge úidi bosatý keregin 2020 jyldan beri birneshe ret habarlanǵany aityldy.
