"Bank TsentrKredit" baspasóz qyzmeti Almatynyń Aqbulaq móltekaýdanyndaǵy daýly úige qatysty pikir bildirdi. Úiden shyǵarý kezinde er adam eki politsiia qyzmetkerin, sot oryndaýshysyn jáne eki beibit turǵyndy atyp óltirgen, - dep habarlaidy "Ult aqparat".
"Aqbulaq" móltekaýdanynda bolǵan qaiǵyly oqiǵaǵa bailanysty "Bank TsentrKredit" AQ qaza tapqandardyń týystary men jaqyndaryna qaiǵyryp kóńil aitady. Qaiǵyly jaǵdai bizdi dúr silkindirdi, biz barlyq jaǵdaidy tek quqyq aiasynda sheshý kerek ekenine senimdimiz", - delingen habarlamada.
Sondyqtan banktiń baspasóz qyzmeti oqiǵaǵa qatysty pikir bildirýdi jón kórgen.
"2011 jylǵy shildede "Nano Pliýs" JShS qaryz alýshysyna negizgi borysh pen paiyzdar boiynsha tólemdi 6 aiǵa keiinge qaldyra otyryp, jalpy somasy 102 000 000 teńgege eki qaryz berilgen.
Sharttar boiynsha mindettemelerdi oryndaýdy qamtamasyz etý retinde kepil sharttary jasaldy, onda kepilmen qamtamasyz etý retinde turǵyn emes úi-jai, jer ýchaskesi, sondai-aq Almaty qalasy, Alataý aýdany, "Aqbulaq" shaǵyn aýdany, Syzdyqov kóshesi, 29 úi mekenjaiy boiynsha ornalasqan turǵyn úi qabyldandy", - delingen habarlamada.
Bank málimetinshe, mindettemelerdi oryndamaý týraly 2012 jyldyń 11 qazanynda jáne 2013 jyldyń 17 qańtarynda habarlamalar joldanǵan. Qaryz alýshy men kepilgerlerdiń sharttar boiynsha kózdelgen mindettemelerdi oryndamaýyna bailanysty 2013 jyldyń 17 sáýirinde bereshekti sot tártibimen óndirip alý týraly sheshim qabyldandy. Osy kezden bastap bank osy qaryz boiynsha paiyzdardy esepteýdi toqtatqan.
Bank Almaty qalasy Almaly aýdanynyń №2 aýdandyq sotyna qaryz alýshy men kepilgerlerden bereshekti óndirip alý týraly talap aryz bergen.
Qazaqstan Respýblikasynyń "Atqarýshylyq is júrgizý jáne sot oryndaýshylarynyń mártebesi týraly" zańynyń 74-baby 2-tarmaǵyna sáikes: "Boryshker sot oryndaýshysy múlikke tyiym salýdy qoldanǵannan jáne baǵalaý júrgizgennen keiin jáne múlik alyp qoiylǵanǵa nemese ótkizilgenge deiin sot oryndaýshysynyń jazbasha ruqsatymen jáne ol belgilegen merzimde tyiym salynǵan múlikti baǵalaý qunynan tómen bolmaityn qun boiynsha ótkizýge quqyly". Boryshker de, kepilger de bul quqyqtaryn paidalanbady, deidi bank baspasóz qyzmeti ókilderi.
"Qazaqstan Respýblikasynyń "Atqarýshylyq is júrgizý týraly" zańynyń 80-baby 3-tarmaǵyna sáikes: "Elektrondyq aýktsion boryshkerdiń múlkin ótkizýge berý týraly qaýlyda kórsetilgen baǵalaý qunynan belgilengen qadammen múliktiń qunyn kóterýmen bastalady.
Eger elektrondyq aýktsionǵa qatysýshylardyń eshbiri saýda-sattyqtyń aldyn ala belgilengen qadamyn qoldai otyryp múlik qunyn arttyrmaǵan jaǵdaida, elektrondyq aýktsion qundy tómendetýge aýysýmen jalǵasady.
Bul rette, ótkiziletin múliktiń bastapqy baǵasy qatysýshylardyń biri jariialanǵan baǵa boiynsha múlikti satyp alýǵa kelisken kezge deiin belgilengen qadammen tómendetiledi, bul baǵa elektrondyq aýktsionǵa qoiylǵan múlik qunynyń bastapqy baǵasynyń elý paiyzynan tómen bolmaýǵa tiis", - dedi baspasóz qyzmeti ókilderi.
2018 jyldyń 22 qańtarynda Almaty qalasy Alataý aýdandyq sotynyń syrttai sheshimimen kepilgerdiń kepil retinde salǵan tiesili turǵyn úii óndirýge joldanǵan.
2018 jyldyń 16 tamyzynda turǵyn úi túrinde kepilge qoiylǵan múlikke elektron sot aýktsiondary ótkizilipti. Elektron aýktsion nátijeleri týraly hattama boiynsha N.S.Turǵanov jeńimpaz dep tanylǵan. 23.08.2018 jyly jeke sot oryndaýshysy men N.S.Turǵanov arasynda satý-satyp alý kelisimsharty jasalǵan.
"26.12.2018 jyly Almaty qalasy Alataý aýdandyq sotynyń uiǵarymymen Almaty qalasy Alataý aýdandyq sotynyń 22.01.2018 jylǵy turǵyn úi túrindegi kepil múlkin óndirip alýǵa júginý týraly syrttai sheshiminiń kúshi joiyldy.
Almaty qalalyq sotynyń apelliatsiialyq sot alqasynyń 27.11.2019 jylǵy qaýlysymen, bastapqy satý quny 29 417 000 teńge mólsherinde satý kezinde turǵyn úi túrindegi kepildik múlikten óndirip alýdy qoldaný týraly banktiń talap-aryzyn qanaǵattandyrý týraly sheshim shyǵaryldy", - delingen habarlamada.
Baspasóz málimetinshe, QR Joǵarǵy Sotynyń azamattyq ister jónindegi sot alqasynyń 27.07.2020 jylǵy qaýlysymen Almaty qalalyq sotynyń azamattyq ister jónindegi sot alqasynyń 27.11.2019 jylǵy qaýlysyn QR QK azamattyq ister jónindegi sot alqasynyń sot otyrysynda qaraý úshin qaita qaraý týraly A.P.Demirchian, I.I.Dýjnova shaǵymyn qaraýdan bas tartyldy. Osylaisha, turǵyn úi N.S.Turǵanovtyń menshiginde qaldy (buryn alǵashqy sot saýdasynda satyp alynǵan).
"Keiin úiden shyǵarý jeke tulǵanyń (satyp alýshynyń) paidasyna sot aktisi negizinde júzege asyryldy, osylaisha azamattar arasyndaǵy kóshirý isi quqyqtyq qatynastary qaiǵyly jaǵdaiǵa ulasqan. Bank turǵyn úidi satýdy da, keiinnen shyǵarýdy da júrgizgen joq.
Banktiń kepilinde turǵan turǵyn emes úi-jaiǵa qatysty 07.03.2017 jylǵy áleýetti satyp alýshylar bolmaýyna bailanysty ol boiynsha alǵashqy elektron sot saýdasy bolǵan joq. 18.04.2017 jylǵy qaitalama elektron sot saýdasy ótkizildi. Satyp alýshylardyń bolmaýyna bailanysty jáne júrgizilgen sot saýda-sattyǵynyń nátijeleri boiynsha joǵaryda kórsetilgen múlik aýktsion sheńberinde tómendetiletin saýda-sattyqtan keiin 96 008 120 teńge somasyna banktiń menshigine ótti. 24.04.2017 jyly bank pen JSO (jeke sot oryndaýshysy) arasynda turǵyn emes úi-jailardy satyp alý-satý sharty jasaldy", - dedi baspasóz qyzmeti ókilderi.
Bánk málimetinshe, uzaq ýaqyt boiy bank turǵyn emes úi-jaiǵa menshik quqyǵyn tirkei almaǵan, óitkeni burynǵy menshik iesi jerge ornalastyrý jobasy boiynsha jumystardy júrgizý jáne tehnikalyq pasport daiyndaý úshin jer komiteti men bank qyzmetkerlerine ruqsat bermegen.
Is júzinde bank menshik quqyǵyn 2021 jyldyń mamyrynda tirkepti. Tiisinshe, 2017 jyldan bastap qazirgi ýaqytqa deiin bank turǵyn emes múlikke menshik etpeidi jáne 2021 jylǵy shildede Almaty qalasy Bostandyq aýdandyq sotyna turǵyn emes úi-jaidy jer ýchaskesimen paidalanýdaǵy kedergilerdi joiýǵa májbúrleý týraly talap-aryz bergen.
"Bank osy oqiǵada qaza tapqan qazaqstandyqtardyń týǵan-týystary men jaqyndaryna taǵy da qaiǵyryp kóńil aitady. Biz osy oqiǵany tergeýge belsendi qatysamyz, is boiynsha barlyq qajetti qujatty usynamyz jáne zardap shekkenderdiń týystaryna jan-jaqty kómek kórsetemiz", - dep túiindedi baspasóz qyzmeti ókilderi.
Aita keteiik, 20 qyrkúiekte keshke Almatyda atys boldy. 54 jastaǵy er adam úiden shyǵarý týraly sot sheshimin oryndaýǵa kelgen sot oryndaýshysyna, politsiia qyzmetkerlerine jáne aýlada bolǵan ózge eki adamǵa ańshy myltyǵynan oq jaýdyrǵan. Nátijesinde bes adam qaza tapty. Eki politsiia qyzmetkeri, bir jeke sot oryndaýshysy jáne eki turǵyn. Olardyń biri - úidiń jańa iesi, ekinshisi - onyń tanysy.
