Almatylyq úsh alpinist - Murat Ótebaev, Andrei Korneev jáne ókpe qabynýynan qaitys bolǵan Aleksandr Chechýlin «Jeńis» shyńynda qalyp qoidy, dep habarlaidy "Ult aqparat".
Joǵalǵan alpinisterdiń biriniń qyzy Aigúl Matai: «Olar 6600 metr biiktikte qalyp qoidy, tómen túsýge eshqandai múmkindikteri joq» dep jazdy óziniń Instagram paraqshasynda.
«Aýa-raiynyń qolaisyzdyǵy men qajetti qural-jabdyqtardyń jetispeýinen alpinister toby bazalyq lagerge ýaqytynda túse almady. Aman qalǵan Murat Ótepbaev pen Andrei Korneev eshkimmen bailanysa almaidy», - dep jazdy Aigúl.
Onyń aitýynsha, Qyrǵyzstan TJM qutqarýshylar toby MI-8 tikushaǵymen 6600 metr biiktikke jaqyn aimaqtardy ainalyp ótti. Alaida, aýa-raiynyń qolaisyzdyǵyna bailanysty izdeý jumystary toqtatyldy.
Aigúldiń aitýynsha, búgin tańerteń ol bir top alpinistermen birge Buryndai áýejaiynan Almatyǵa ushpaqshy.
«Aýa-raiy qolaisyz bolǵandyqtan, qutqarý tobyn jaiaý jiberýge bolady. Azamattyq tikushaqtar biiktiktegi shamadan tys qysymǵa tótep bere almaidy. Dostar, qazaqstandyqtar, mundai jaǵdaida kómektesýlerińizdi suraimyz!. Biz ár kúnimizdi olardyń tiri ekenine degen úmitpen ótkizip kelemiz. Ákemniń joldastary, olardyń aman-esen úige oralýyna kómektesińizder. Bizge altynshy sanattaǵy taýlarǵa shyǵý quqyǵy bar kásibi alpinister qajet. Ózderińizben birge tólqujat nemese jeke kýálik bolýy kerek. Jol qiyn, biraq úmit bar. Qazirgi ýaqytta muzdyqta alpinister joq. Men sonymen qatar Qyrǵyzstannyń eń tájiribeli alpinisterine júginemin», - degen qyz óziniń bailanys nómirin qaldyrdy: 8 707 615 60 42.
Murat Ótepbaevtyń alpinizm boiynsha 13 jyldyq tájiribesi bar. Alpi Aziia komandasynyń jattyqtyrýshysy, tórt balanyń ákesi.
Óz kezeginde IIM TJK-i izdestirý jumystaryn QR Qorǵanys ministrligimen birge júrgizilip jatqandyǵyn atap ótti.
«Tikushaqtar daiyn. Biz aýa-raiynyń jaqsarýyn kútemiz», - dedi QR IIM Tótenshe jaǵdai ókilderi.
Osyǵan deiin Tian-Shan taýlarynda almatylyq alpinist Aleksandr Chechýlinniń kóz jumǵanyn habarlaǵan edik.
