Foto: gov.kz
Almatyda nemere inisine qatysty seksýaldyq sipattaǵy zorlyq-zombylyq jasady dep aiyptalǵan 35 jastaǵy er adam sot sheshimimen aqtaldy. Alaida jábirlenýshi tarap bul úkimmen kelispei, isti qaita qaraýdy talap etip otyr, dep habarlaidy Ult.kz Tengrinews.kz-ke silteme jasap.
Aiyptaý materialdaryna sáikes, kúdikti 2022–2025 jyldar aralyǵynda kámeletke tolmaǵan balaǵa birneshe ret zorlyq-zombylyq áreketterin jasaǵan bolýy múmkin degen derek keltirilgen. Bala týystarynyń aitýynsha, ol 17 aqpanǵa qaraǵan túni úiden qashyp kelip, zorlyq faktileri týraly alǵash ret habarlaǵan.
Tergeý barysynda jábirlenýshi de, onyń kámeletke tolmaǵan qaryndasy da sotta jaýap bergen. Olardyń aitýynsha, aiyptalýshy tarapynan qorqytý men qysym bolǵan. Alaida er adam ózine taǵylǵan aiyptardy joqqa shyǵaryp, ol ýaqytta basqa óńirlerde jumys istegenin málimdedi.
Sot protsesi barysynda taraptar usynǵan dáleldemeler bir-birine qaishy kelgen. Saraptama nátijeleri baladan dene jaraqatyn anyqtamaǵan, sondai-aq DNQ izderi de tabylmaǵan. Sonymen qatar saraptama onyń psihikalyq jaǵdaiy is-áreketti túsinýge qabiletti ekenin kórsetken.
Osyǵan bailanysty Almaty qalasynyń qylmystyq ister jónindegi mamandandyrylǵan aýdanaralyq soty 2025 jylǵy 29 jeltoqsanda er adamdy kinásiz dep tanyp, qylmystyq quramnyń dáleldenbeýine bailanysty aqtaý úkimin shyǵardy.
Er adam sot zalynan bosatylyp, zańsyz qýdalaý úshin ótemaqy talap etý quqyǵyna ie boldy.
Alaida jábirlenýshi tarap sot sheshimimen kelispeidi. Olardyń aitýynsha, aiyptalýshynyń týystary qysym kórsetip, aryzdy qaitaryp alýǵa májbúrlemek bolǵan. Sondai-aq isti qoǵamdyq deńgeide yqpal etý arqyly burmalaýǵa áreket jasalǵany aityldy.
Týystary apelliatsiialyq shaǵymdy qaraý protsesiniń keshigýine de alańdaýshylyq bildirýde. Olar sot sheshimin qaita qaraýdy talap etip otyr.
Almaty qalasynyń prokýratýrasy aqtaý úkimimen kelispei, apelliatsiialyq ótinish bergenin rastady. Is qalalyq sottyń qaraýynda.
