Almaty qalasynyń ákimi Baqytjan Saǵyntaev qosymsha bilim alýǵa qatysty pikir bildirdi, dep habarlaidy QazAqparat.
«Meni alańdatatyn jait - turmysy tómen otbasynan shyqqan balalardyń qosymsha bilim alýyna múmkindik joq. Tegin úiirmeler tek qaǵaz júzinde ǵana jumys isteidi. Sondyqtan, bizge qosymsha jáne orta bilim berý júiesiniń qyzmetin tolyq úilestirý qajet. Ol úshin qosymsha bilim berýdi damytyp, ony mektep baǵdarlamasymen belsendi túrde biriktirý qajet. Úiirmeler men sektsiialardy qarjylandyrý úshin biznesti tartý qajet. Mektepter qalalyq ortany belsendi paidalanýy kerek. Oqýshynyń bilim alýy men damýy úshin qalamyzdyń múmkindikteri barshylyq», - dedi ákim Almatydaǵy bilim berý júiesi qyzmetkerleriniń forýmynda.
Sonymen qatar, ol Almatydaǵy Oqýshylar saraiynyń jaǵdaiyn baiandap berdi.
«Senbi kúni men Oqýshylar saraiynda boldym. Onda kóbine Medeý aýdanynyń balalar keledi. Tarihi erekshe ǵimarat. Biraq ishindegi qosymsha bilim berý júiesi zamanaýi talaptarǵa sáikes kelmeidi. Bul k- eńestik formattaǵy qarapaiym synyptar. Qarapaiym ústelder, shkaftar, parta ústindegi kompiýterler bári-bári burynǵy. Biz oqýshylar saraiyn jóndeýdi bastaimyz. Men mamandarǵa ne isteý kerektigin qarap, aitýdy tapsyrdym. Maǵan trenajer zaly, bassein, is-sharalar men kezdesýlerge arnalǵan úlken jáne kishi zaldardy ǵana kórsetti. Balalarǵa arnalǵan basqa bólmeler qaida?! Úlken ǵimarat eski standartqa sai jumys isteitin bolady», - dedi A Baqytjan Saǵyntaev.
Sondai-aq, ol barlyq aýdandaǵy mektep basshylaryna kóp balaly jáne az qamtamasyz etilgen otbasylardyń balalary úshin mektep qabyrǵasynda tegin sektsiialar men úiirmeler uiymdastyrýdy tapsyrdy.
«Búgingi tańda oqýshylarǵa arnalǵan úiler men mýzyka mektepteri qalanyń ortalyǵynda ornalasqan. Bul qala shetindegi aýdandar úshin qolaisyz. Máselen, 40 myńnan astam bala oqyp jatqan Alataý aýdanynda bir ǵana mektep úii bar. 14 myńǵa jýyq oqýshysy bar Naýryzbai aýdanynda qosymsha bilim berýdiń birde bir uiymy joq. Sondyqtan biz birtindep qalanyń shet jaǵynda mektep oqýshylarynyń sarailary men úilerin salýymyz kerek. Olardy abattandyrý boiynsha kóptegen jumystar kútip tur. Júzdegen balalar oiyn jáne sport alańdaryn salý qajet.», - dep atap ótti qala basshysy.
