Qazaqstan ishki ister ministri Erlan Turǵymbaevtyń tapsyrmasy boiynsha ministrdiń orynbasary Murat Baimuqashev qaza bolǵan politsiia qyzmetkerleri Darhan Súleev pen Nurbol Baiǵazievtiń otbasylaryna bardy, - dep habarlaidy Polisia.kz saity.
IIM basshylyǵy, ishki ister organdarynyń jeke quramy atynan qyzmettik mindetin oryndaý kezinde qaza tapqan politsiia qyzmetkerleriniń týystary men jaqyndaryna kóńil aitty.
"Ishki ister ministriniń qoldaý haty boiynsha Almaty qalasynyń ákimdigi qaza tapqan politsiia qyzmetkerleriniń otbasyna turǵyn úi beredi. Sonymen qatar, ishki ister ministriniń buiryǵy boiynsha tártip pen zańdylyqty sońyna deiin kúzetken ýchaskelik inspektorlar "Quqyq tártibin qamtamasyz etýge kosqan úlesi úshin" medaldarymen marapattaldy", - delingen habarlamada.
Alataý aýdandyq PB JPQB ýchaskelik inspektory, politsiia maiory Súleev Darhan Daýylbaiuly, 1982 jyly týǵan, QR IIM Almaty Akademiiasynyń Magistratýrasyn bitirgennen keiin 2003 jyldan bastap ishki ister organdarynda qyzmet etti. 2021 jyldyń tamyzynda ýchaskelik inspektor laýazymyna taǵaiyndalǵan edi. IIO qyzmet etken jyldar ishinde ol 6 marapatqa ie boldy, onyń ishinde "Ishki ister organdaryndaǵy minsiz qyzmeti úshin" 3-dárejeli medalimen, sondai-aq "Qazaqstan politsiiasyna 25 jyl" tósbelgisimen marapattaldy. Úilengen, kámeletke tolmaǵan bes balasy bar.
Alataý aýdandyq PB JPQB ýchaskelik inspektory, politsiia kapitany Baiǵaziev Nurbol Nazarbaiuly, 1988 jyly týǵan, ishki ister organdarynda 2014 jyldan beri qyzmet etken. Ol 13 marapatqa ie boldy, onyń ishinde "Úzdik qutqarýshy jaýynger" jáne "Qazaqstan politsiiasyna 25 jyl" tósbelgilerimen marapattaldy. Úilengen, kámeletke tolmaǵan eki balasy bar.
