Almaty qalasynyń ákimdigi azyq-túlik baǵasyn turaqtandyrý úshin 22 mlrd teńgege forvardtyq kelisimshart jasasty, dep habarlaidy QazAqparat.
«Byltyr biz ainalymdyq shemany iske qosqan bolatynbyz. Ol boiynsha iri saýda ortalyqtary men óndirýshilerge jeńildetilgen nesie bólemiz. Osy nesieni ala otyryp olar áleýmettik mańyzy bar azyq-túlik baǵasyn kótermeýge mindetteme alady. Osylaisha baǵanyń kúrt ósýin boldyrmaimyz», - dedi Ortalyq kommýnikatsiialar qyzmetinde ótken brifingide qala ákimi Baqytjan Saǵyntaev.
Ákim sórelerdegi kartop pen sábiz baǵasyn retteý úshin ońtústik óńirlermen tyǵyz jumys jasalyp jatqanyn atady.
«Iá, maýsym aralyǵynda kartop, sábiz, qyryqqabat siiaqty ónimderdiń baǵasy qymbattap ketti. Qazir biz Túrkistan oblysymen barlyq azyq-túlik túrin jetkizý boiynsha kelisim jasadyq. Qant boiynsha byltyrdan beri Almaty oblysyndaǵy Aqsý zaýytymen jumys istep kelemiz. Kelisimshartta kórsetilgen baǵa qazir bizge ózge jetkizýshiler usynyp jatqan baǵadan tómen ekenin aitý kerek. Osy sharalardyń bári qazir bizge qajetti azyq-túlik baǵasyn qymbattatpai ustaýǵa múmkindik berip otyr. Sondai-aq, qazir Tájikstanmen tikelei jumys istep jatyrmyz. Qalalyq biznes túrli ónimder jetkizý boiynsha tikelei bailanys ornatyp, delegatsiialar almasty. Tájikstannan alǵashqy kólem kelip jatyr», - dedi Baqytjan Saǵyntaev.
Qala ákimi bul iste irgedegi Almaty oblysynyń áleýeti tolyq paidalanylmai jatqanyna toqtaldy.
«Almaty oblysynyń ákimimen kezdesken kezde de aitqanmyn, biz jylyna 1 mln tonna azyq-túlik tutynamyz. Almaty oblysy osy kólemmen bizdi qamtýǵa tolyqtai jumys istei alady. Qazir ishinara 1 mln tonna degen – óte úlken naryq. Atalmysh ólkedegi osy aqyly sharýalarǵa da qoldaý kórsetken bolar edik. Qazir ishinara Túrkistan jáne Almaty oblystarymen jumys istep jatyrmyz. Kartopty qazir Pavlodar oblysynan alyp otyrmyz. Ekinshi aralyq maýsymǵa daiyndyq barysynda 22 mlrd teńgege forvardtyq kelisimshart jasap qoidyq. Bul maqsatqa biýdjetten jetkilikti qarajat bólinip otyr», - dedi ákim.
Onyń sózine qaraǵanda, qalanyń barlyq bazarlarynda áleýmettik azyq-túlik dúńgirshekteri ashylǵan. Ondaǵy baǵa basqa ózge saýda núktelerine qaraǵanda 30-50 paiyz tómen.
«Tipti sol bazardaǵy irgeles sórelerdiń ózi soǵan qarap, baǵany túsirip jatyr. Jumyrtqa baǵasyna da shekti baǵa bekittik. Endi qyryqqabattyń baǵasyn da bekitpekshimiz», - dedi qala basshysy.
