Foto: Polisia.kz
Almaty qalasynda bolǵan rezonanstyq jol-kólik oqiǵasy Ishki ister ministriniń tapsyrmasymen erekshe baqylaýǵa alyndy, dep habarlaidy Ult.kz.
Aldyn ala málimet boiynsha, atalǵan apatqa qatysty qylmystyq is qozǵalǵan. ZEEKR avtokóliginiń júrgizýshisi sot sanktsiiasymen qamaýǵa alyndy. Tergeý barysynda onyń jeńil dárejede alkogoldik masań kúide bolǵany anyqtalǵan.
Sonymen qatar ministrdiń tapsyrmasymen qyzmettik tekseris bastalyp, onyń obektivti ótýin qamtamasyz etý úshin Almatyǵa IIM-niń birneshe qurylymdarynyń basshylary men tájiribeli qyzmetkerleri jiberildi.
Budan bólek, memlekettik nómirlik belgilerdiń zańsyz berilýi múmkin degen kúdik boiynsha da qylmystyq is qozǵaldy. Sondai-aq politsiia departamenti basshylarynyń biriniń júrgizýshisine qatysty áreketsizdik faktisi boiynsha tergeý bastalyp, kúdikti ýaqytsha ustaý izoliatoryna qamaldy.
Júrgizilip jatqan tergeý men qyzmettik tekseris aiasynda barlyq mán-jailar, onyń ishinde áleýmettik jelilerde taraǵan aqparat jan-jaqty qaralýda. Nátijesinde birqatar kadrlyq sheshimder qabyldanyp, Almaty qalasy politsiia departamenti bastyǵynyń orynbasary, sondai-aq ákimshilik politsiia jáne qoǵamdyq qaýipsizdik basqarmalarynyń basshylary qyzmetten bosatyldy.
IIM resmi ókili Shyńǵys Alekeshev zań buzýshylyqtar rastalǵan jaǵdaida apatqa qatysy bar barlyq tulǵalar jaýapqa tartylatynyn málimdedi. Onyń aitýynsha, zań aldynda bári teń jáne eshkimge artyqshylyq berilmeidi.
Politsiia azamattardy tek resmi aqparatqa senýge jáne jalǵan málimet taratpaýǵa shaqyrdy.
