Muǵalimderdiń kásibi merekesi qarsańynda Almaty ákimi Baqytjan Saǵyntaev «Jyl muǵalimi» baiqaýynyń jeńimpazdaryna baǵaly syilyqtar men aqshalai granttar tapsyrdy, dep habarlaidy "Ult aqparat".
Almaty telearnasynyń tikelei efirinde kórsetilgen sharaǵa pedagog ardagerler, muǵalimder jáne bilim uiymdarynyń basshylary qatysty.
Merekelik rásim barysynda «Almatynyń jyl muǵalimi» jáne «Almaty qalasy ákiminiń arnaiy granty» qalalyq baiqaýlarynyń, sonymen qatar «Úzdik pedagog» respýblikalyq baiqaýy qalalyq týrynyń jeńimpazdary marapattaldy.
«Almatynyń jyl muǵalimi» jáne «Almaty qalasy ákiminiń arnaiy granty» qalalyq baiqaýlary Almaty ákimi Baqytjan Saǵyntaevtyń bastamasy boiynsha byltyr alǵash ret uiymdastyrylǵan edi.
«Jyl muǵalimi» qalalyq baiqaýynyń Gran-pri júldegeri №133 mekteptiń oqytýshysy Maqpal Shúkeevaǵa 2 bólmeli páterdiń kilti, al 1-oryndy jeńip alǵan №140 mektep-gimnaziianyń oqytýshysy Dáýren Saǵynǵalievke kólik kilti tapsyryldy.
Qalǵan jeńimpazdarǵa aqshalai júldeler men granttar berildi. Birqatar muǵalim Bilim jáne ǵylym ministrliginiń alǵys hatyn aldy.
Qalanyń pedagogikalyq qaýymdastyǵyn quttyqtaǵan Almaty ákimi ustazdardyń eń mártebeli missiia – óskeleń urpaqqa tárbie men bilim beretinderin atap ótti.
«Muǵalimderge zor jaýapkershilik júktelip otyr, óitkeni bolashaqta elimizde qandai urpaqtyń ómir súrip, eńbek etetini ustazdarǵa tikelei bailanysty», - dedi qala ákimi Baqytjan Saǵyntaev.
Qala ákimi bilim júiesin damytý sharalary, bilim berýdiń jańa mekemelerin salý, jas mamandarǵa qoldaý kórsetý týraly da aityp ótti. Mysaly, biyl qala mektepterinde ózderiniń eńbek joldaryn bastaǵan jas muǵalimderge materialdyq kómek retinde birrettik tólem berý praktikasy jalǵasatyn bolady. Qazan aiynda jalpy somasy 27 mln teńgeden asatyn tólemdi 549 jas muǵalim aldy.
Aita keterligi, qala muǵalimderiniń turǵyn úi jaǵdaiyn jaqsartý máselesine airyqsha nazar aýdarylady. Búgingi kúni jeńildetilgen nesie beretin «Almaty jastary 3.0» qalalyq baǵdarlama aiasynda 187 jas muǵalim baspanaly boldy.
Almatynyń bilim júiesinde 32 myńnan astam pedagog bar, olardyń 500-den astamy - biyl ózderiniń alǵashqy eńbek joldaryn bastaǵan jas mamandar.
