Almatyda joǵalǵan Aqnazar Qajymurattyń máiiti tabyldy. Ol ACT jáne SAT Subject Tests halyqaralyq emtihandarynda eń joǵary upai jinaǵan túlek retinde keńinen tanylǵan, dep habarlaidy Sputnik Qazaqstan.
Aqnazardyń týǵan-týystary áleýmettik jelide oǵan izdeý salǵan. Ol 3 qarashada iz-túzsiz joǵaldy. Sol kúni keshki ýaqytta ájesimen telefon arqyly sóilesken. Odan keiin bailanysqa shyqpapty.
Almaty qalalyq politsiia departamenti usynǵan málimetke sáikes, 4 qarashada Aqnazar Qajymurattyń joǵalýyna bailanysty aryz túsken. Sodan arnaiy izdeý toby quryldy.
Búgin kriminaldyq politsiia qyzmetkerleri jas jigittiń denesin Bostandyq aýdanynan tapty. Denesinde zorlyq-zombylyq izderi joq. Qazirgi kezde Aqnazardyń ólimine sebep bolǵan jaittar anyqtalyp jatyr. Sot-meditsinalyq saraptama taǵaiyndaldy.
Aita keteri, 2018 jyly Aqnazar Qajymurattyń esimi álemniń jas daryndary arasynda keńinen tanyldy. Almatydaǵy fizika-matematika baǵytyndaǵy Nazarbaev ziiatkerlik mektebiniń túlegi ACT jáne SAT Subject Tests halyqaralyq emtihandarynan súrinbei ótip, eń joǵary upai jinady. Sonyń arqasynda Amerikanyń kez kelgen úzdik joǵary oqý ornyn tańdaýǵa múmkindik alǵan. Ol Garvard ýniversitetiniń grantyn aldy.
