Almaty politsiiasy men ulttyq qaýipsizdik komitetiniń qyzmetkerleri tintý barysynda turǵynnyń mashinasy men úiinen oq atatyn toǵyz qarý, oq-dári men RGD-5 granatasy tárkilengen er adamdy qamaýǵa aldy.
Arnaiy operatsiia keshe Almatydaǵy Jandosov pen Iasaýi kósheleriniń qiylysynda ótti, dep jazdy Rolisia.kz.
"Kúdiktiniń ózinen jáne kóliginen oq-dárisi bar eki tapansha tárkilendi. Taǵy alty qarý, sonyń ishinde 12-shi kalibrli vinchester, granata men 60 oq-dári azamattyń Almaty oblysy Talǵar aýdanyndaǵy turǵylyqty mekenjaiynda qupiia orynnan anyqtaldy", - dep málimdedi Almaty politsiiasy departamentiniń kriminaldy politsiia basqarmasynyń basshysy Qýatbek Naýatov.
Onyń aitýynsha, qazirgi ýaqytta er adamnan tárkilengen barlyq qarý ballistikalyq saraptama júrgizý úshin zerthanaǵa joldandy. Saraptama arqyly Almaty jáne eldiń basqa da óńirlerdegi qylmysqa osy qarýlardyń qatysy bar-joǵy anyqtalady.
Sonymen qatar kúdiktiniń úiin tintý kezinde untaq tárizdes zat oralǵan tórt qaptama tabyldy. Onyń quramyn da saraptama anyqtaidy. Kúdiktini ustaý kezinde ol esirtki áserinen esin bilmeitin kúide bolǵan.
Er adam ýaqytsha ustaý izoliatoryna qamaldy. Qazaqstan Respýblikasy Qylmystyq kodeksiniń 287-babynyń 3-bóligi ("Qarý-jaraqty, oq-dárini, jarylǵysh zatty jáne jarylǵysh qurylǵyny zańsyz satyp alý, berý, satý, saqtaý, tasymaldaý nemese ózimen birge alyp júrý") boiynsha sotqa deiingi tergeý bastaldy.
Er adam bes jylǵa deiin abaqtyǵa jabylýy múmkin.
