Almatyda eki kún buryn jerasty ótkeline soǵylǵan trolleibýsqa qatysty oqiǵanyń mán-jaiy belgili boldy, - dep habarlaidy "Ult aqparat".
Qoǵamdyq densaýlyq saqtaý departamenti málimetinshe, oqiǵa ornynan jeti adam emes, tórt adam №4 qalalyq klinikalyq aýrýhanaǵa jetkizilgen.
"Tekserýden keiin olardyń úsheýi bekitilgen jerdegi emhanaǵa ambýlatorlyq emdelýge jiberildi. Jaralanǵandardyń biri mamandandyrylǵan bólimge jatqyzyldy", - dedi Qoǵamdyq densaýlyq saqtaý departamentindegiler.
Al áleýmettik jelilerde jol apatyna sebepshi bolǵan tájiribeden ótip júrgen júrgizýshi ekeni týraly aqparat tarady. Bul týraly jol apatynan zardap shekken áieldiń jubaiy Vladimir Shatskih Facebook-paraqshasynda jazdy. Sonymen qatar, ol jedel járdem qyzmeti men №4 qalalyq klinikalyq aýrýhana jumysyna shaǵymdandy.
"Almatyelektrotrans" júrgizýshiniń jumys tájiribesi joq degen aqparatty joqqa shyǵaryp, 1959 jylǵy júrgizýshiniń jumys tájiribesi mol ekenin málimdedi. Biraq ol buryn jumystan shyǵyp, qaita ornalasqandyqtan stajer statýsyn alǵan. Jol apatynan er adam zardap shekken joq. Uiym basqa máseleler boiynsha áli pikir bildirmedi, sebebi bul is boiynsha tergeý júrgizilip, qylmystyq is qozǵalǵan.
Eske salaiyq, 21 tamyz kúni shamamen saǵat 14:50-de Baizaqov kóshesinen keiin batys baǵytyndaǵy Abai dańǵylynyń boiynda jol-kólik oqiǵasy oryn aldy. BN 1240 trolleibýsynyń júrgizýshisi qysqa ǵana ýaqyttyń ishinde ózin jaisyz sezinip, sonyń saldarynan rýlge ie bola almai qalǵan. Saldarynan qoǵamdyq kólik ótkeliniń qabyrǵasyna soǵylǵan.
