Almatyda apatty úiler turǵyndardyń 100% kelisimimen buzylady. Bul týraly 2021-2025 jyldarǵa arnalǵan turǵyn úi qoryn jańartý baǵdarlamasynyń tanystyrylymy barysynda «Almaty» áleýmettik-kásipkerlik korporatsiiasy» AQ basqarmasynyń tóraǵasy Asqar Bilisbekov aitty, dep habarlaidy QazAqparat.
Qalada 1930-1975 jyldar aralyǵynda salynǵan apatty 1427 eki qabatty úi bar. Tozyǵy jetken úilerdiń eń kóbi – Túrksib aýdanynda. Munda 607 úidi qaita buzyp-salý kózdelgen.
Eski úilerdiń negizgi problemalary: seismikalyq, órt qaýpi, sondai-aq injenerlik jelilerdiń joqtyǵy.
«Bul úilerdiń basym bóligi aǵash-qamystan salynǵan. Kirpishten salynǵan úiler - negizinen qalanyń ortalyǵynda. Búgingi kúni 708 apatty úidi aýystyrý qajet. Jeke investitsiia arqyly - 458 úi. Búginde onyń 280-de jumys júrip jatyr», - dedi Asqar Bilisbekov.
Sonymen qatar, ol tozyǵy jetken úiler tek turǵyndardyń ózderi 100 paiyz kelisim bergen jaǵdaida ǵana buzylatyndyǵyn basa aitty.
«Eger, mysaly, tozyǵy jetken úilerde turatyn 10 turǵynnyń 9-y kelisip, bireýi bas tartsa, onda buzý bolmaidy. Májbúrli túrde buzý bolmaidy, ol tek turǵyndardyń 100% kelisimimen júzege asyrylady», - dep qosty spiker.
Baǵdarlama tetigi boiynsha úi iesine ýaqytsha nemese turaqty negizde páter beriledi. Turǵyndardy óz aýdandaryna eski úilerdiń ornyna jańa úi salynǵan kezde orala alady. Menshik ieleriniń qonys aýdarýy turǵyndardyń sanyna qaramastan, páterlerdiń tehnikalyq pasporttaryna sáikes « bir bólmege, bir bólme» printsipi boiynsha júzege asyrylady. Eger páter iesi sharshy metrdi ulǵaitqysy kelse aqshasyn tóleiýi kerek.
2012-2015 jyldarǵa arnalǵan pilottyq baǵdarlama boiynsha Almatyda 56 tozyǵy jetken úi súrilip, 63 kóppáterli turǵyn úi salyndy. Osy baǵdarlamanyń arqasynda 579 otbasy jańa páterge qonystandy.
Buǵan deiin, 2021-2025 jyldarǵa arnalǵan turǵyn úi qoryn jańartý baǵdarlamasy aiasynda Almatyda 708 eski úi buzylyp, 683 turǵyn úi salynatyny týraly jazǵan bolatynbyz.
Baǵdarlamadaǵy eski úilerdiń tizimi apatty baspana turǵyndarynyń aýdandyq ákimdikterine jii júginýi negizinde quryldy.
Baǵdarlamanyń operatory - «Almaty» áleýmettik-kásipkerlik korporatsiiasy» AQ.
Baǵdarlamada júzege asyrý mehanizminiń eki nusqasy qarastyrylǵan:
- «Almaty» ÁKK jáne jeke investor júzege asyratyn jobalar;
- memlekettik qarjylandyrý arqyly júzege asyrylatyn jobalar.
