Almatyda kottedjdiń ekinshi qabatyndaǵy terezeden qulaǵan bala aýyr jaraqattarmen aýrýhanaǵa jetkizildi. Dárigerlerdiń jedel áreketiniń arqasynda onyń ómirine tóngen qaýip seiilip, aýyr jaraqat alǵan qolyn saqtap qalý múmkin boldy, dep habarlaidy ult.kz.
№7 qalalyq klinikalyq aýrýhananyń málimetinshe, bala aýrýhanaǵa túsken kezde onyń jaǵdaiy asa aýyr bolǵan. Ol koma jaǵdaiynda jetkizilip, dárigerler ashyq bas-mi jaraqatyn, bas súieginiń synýyn, miǵa qan quiylýyn, toqpan jiliktiń ashyq synýyn, iyq arteriiasynyń zaqymdanýyn, bilek súiekteriniń synýyn jáne travmatikalyq gemorragiialyq shokty anyqtaǵan.
Naýqas qabyldanǵan boida mamandar qajetti diagnostikalyq tekserýler júrgizip, jaraqattaryn óńdep, jaǵdaiyn turaqtandyrǵannan keiin shuǵyl operatsiiaǵa kirisken.
Kúrdeli otaǵa №7 qalalyq klinikalyq aýrýhana men №2 qalalyq balalar klinikalyq aýrýhanasynyń dárigerleri birlesip qatysty. Operatsiia barysynda mamandar zaqymdalǵan iyq arteriiasyn qalpyna keltirip, synǵan súiekterdi bekitip, qoldyń qan ainalymyn saqtap qaldy. Bul aýyr asqynýlardyń aldyn alýǵa múmkindik bergen.
Jaǵdaiy turaqtalǵannan keiin bala ári qarai em qabyldaý úshin №2 qalalyq balalar klinikalyq aýrýhanasyna aýystyryldy. Qazir ol jansaqtaý jáne mamandandyrylǵan bólim mamandarynyń baqylaýynda em alyp jatyr.
№7 qalalyq klinikalyq aýrýhananyń travmatology Ánýar Beibitovtiń aitýynsha, mundai jaǵdailarda dárigerlerdiń úilesimdi ári jedel jumysy sheshýshi ról atqarady.
Al №2 qalalyq balalar klinikalyq aýrýhanasynyń neirohirýrgiia bóliminiń meńgerýshisi Daniiar Sábdenáliev biikten qulaý oqiǵalarynyń basym bóliginiń aldyn alýǵa bolatynyn atap ótti. Onyń sózinshe, balalardy terezesi ashyq bólmede qaraýsyz qaldyrmaý jáne qaýipsizdik talaptaryn saqtaý qaiǵyly jaǵdailardyń aldyn alýdyń eń tiimdi joly.
