Almaty qalasy ákiminiń orynbasary Erjan Babaqumarov onlain formatta JOO rektorlarymen jataqhana qurylysy máselesi jóninde keńes ótkizdi, dep habarlaidy "Ult aqparat".
Keńeste «Elbasynyń bes áleýmettik bastamasy» aiasynda jataqhana qurylysynyń barysy qaraldy. Basty mindet – stýdent jastardyń ómir súrý jaǵdailaryn jaqsartý, olardy jataqhanalardaǵy oryndarmen qamtamasyz etý.
Almatyda 6 jataqhana paidalanýǵa berildi. Taǵy eki jataqhana salynyp jatyr. Qurylys jumystary 2022 jyldyń basynda aiaqtalady.
Sonymen qatar, 30 jataqhana qurylysy boiynsha daiyndyq jumystary júrgizilýde. Jańa nysandardy salý úshin barlyǵy 22 jer ýchaskesi anyqtaldy. Jalpy 16 myńnan astam tósek-oryn qurý josparlanýda.
Keńeske Abai atyndaǵy Qazaq ulttyq pedagogikalyq ýniversitetiniń, Halyqaralyq biznes ýniversiteti (UIB), Kaspii qoǵamdyq ýniversiteti, Qonaev atyndaǵy Eýraziialyq zań akademiiasynyń, Q. Sátbaev atyndaǵy Qazaq ulttyq tehnikalyq zertteý ýniversiteti, Almaty tehnologiialyq ýniversitetiniń basshylyǵy qatysyp, sóz sóiledi.
Kóterilgen máselelerge qalalyq jer qatynastary basqarmasynyń basshysy Ardaq Samambetov, qala qurylysyn baqylaý basqarmasy basshysynyń orynbasary O.Tólebaev túsinikteme berdi.
Keńes qorytyndysy boiynsha ákimniń orynbasary Erjan Babaqumarov tiisti basqarmalarǵa «Halyq únine qulaq asatyn memleket» tujyrymdamasynyń qaǵidattaryn eskere otyryp, jataqhanalar salý jónindegi jobalardy iske asyrý, sondai-aq rásimdik máselelerdi jedeldetý jáne josparlanǵan obektilerdi ýaqtyly jáne sapaly paidalanýǵa berýdi qamtamasyz etý boiynsha birqatar tapsyrma berdi.
Aita keteiik, jataqhana qurylysy investorlardyń qarajaty esebinen júzege asyrylýda. QR Bilim jáne ǵylym ministrliginiń sheshimine sáikes, nysan paidalanýǵa berilgennen keiin 8 jyl ishinde investorlar úshin investitsiialardyń qaitarymy reglamenttelgen.
Osyǵan bailanysty pandemiia jáne investorlardyń ekonomikalyq qiyndyqtary jaǵdaiynda qurylys merzimine ózgerister engizildi.
