29 mamyrda Almatyda Sharyn shatqalynda nóser jaýyn saldarynan bolǵan sý tasqyny kezinde aman qalǵan 11 jasar Zere men onyń ata-anasy Tótenshe jaǵdailar ministri Iýrii Ilinniń Alǵys hatymen marapattaldy, dep habarlaidy "Ult aqparat" QR TJM baspasóz qyzmetine silteme jasap.
Málimetke sai, búgin qyz bala aýrýhanadan shyqty.
Alǵys hatty Ministrdiń atynan Almaty qalasy TJ departamentiniń bastyǵy tabys etip, Zereniń ata-anasy — Ulan Bisembaiuly men Janiia Shymyrbekqyzyna batyl, erjúrek qyz tárbielegeni úshin, al kishkentai Zerege tótenshe jaǵdailarda tózimdilik, qaisarlyq jáne ómir súrý ádisterin durys qoldanǵany úshin alǵys aitty.
Ministrdiń hatynda «Almaty qalasyndaǵy №199 gimnaziiasynyń oqýshysy Bisembai Zere Ulanqyzy tabiǵi apat saldarynan qaýipti jaǵdaiǵa tap bolyp, oryn alǵan jaǵdailardy baiyppen sabyrly baǵalap, ómir súrýdiń praktikalyq daǵdylaryn qoldana bildi. Bul jaǵdai elimizdiń azamattary úshin ómir qaýipsizdigin qamtamasyz etý daǵdylaryn igerý jáne batyldyq, baisaldylyq jáne kúizeliske qarsy turý siiaqty tulǵalyq qasietterdi tárbieleýde úlgi bolyp tabylady», - dep jazylǵan.
