Almatyda memleket jáne qoǵam qairatkeri, ǵalym-lingvist Nurtas Ońdasynovtyń eskertkish-biýsti ashyldy, dep habarlaidy QazAqparat tilshisi.
Biýst Medeý aýdanynda, Shevchenko men Qonaev kósheleriniń qiylysynda ornatyldy.
Eskertkish-biýstiń ashylý rásimine Almaty qalasynyń ákimi Baqytjan Saǵyntaev qatysty.
«Biz búgin asa kórnekti memleket jáne qoǵam qairatkeri Nurtas Dándibaiuly Ońdasynovtyń qurmetine ornatylǵan eskertkish-biýsttyń saltanatty ashylý rásiminde bas qosyp otyrmyz. Elimizdiń tarihynda óshpestei iz qaldyrǵan ol kóptegen igilikti isterdiń basy-qasynda bolyp, sonaý qiyn zamanda ult múddesi úshin batyl qadamdarǵa bara alǵan uly tulǵa. Qandai joǵary laýazymdy qyzmette júrse de ol el táýelsizdigin, halyqtyń óz bailyǵyn ózi igerý isin, umytylýǵa ainalǵan ana tilimiz ben salt-dástúrimizdi qaita tiriltý máselelerin bárinen de joǵary qoidy. Uly Otan soǵysy men onan keiingi eń aýyr jyldarda Qazaqstan Úkimetin basqardy. Respýblikamyzdyń áleýmettik-ekonomikalyq damýyna, mádenieti men óneriniń, ǵylymy men biliminiń órkendeýine barynsha kúsh saldy.
Nurtas Ońdasynovtyń ónegeli ómiri men halqyna jasaǵan qaltqysyz qyzmetin nasihattaý, jas urpaqtyń sanasyna sińirý – bizdiń abyroily mindetimiz», - dedi qala ákimi quttyqtaý sózinde.
Nurtas Ońdasynov soǵys jyldary Respýblikamyzda Ǵylym Akademiiasynyń derbes shańyraq kóterýine, Qazaq Memlekettik Qyzdar Pedagogikalyq institýty men Ulttyq Konservatoriianyń ashylýyna, Shet tilderi, Dene tárbiesi istitýttarynyń jáne barlyq oblys ortalyqtarynda muǵalimder daiarlaityn joǵary oqý oryndarynyń qurylýyna birden bir uiytqy bolǵan.
Sonymen qatar, Nurtas Dándibaiuly elimizdegi iri qurylystardyń – Ertis-Qaraǵandy, Arys-Túrkistan, Myrzashól kanaldarynyń, Atyraý, Temirtaý, Jezqazǵan, Balqash, Aqtóbe qalalaryndaǵy iri zaýyttardyń, Moiynty-Shý temir jolynyń salynýyna tikelei basshylyq etken tulǵa.
