Foto: Almaty ákimdigi
Almatyda 14 naýryzdan bastap «Naýryznama» tujyrymdamasy aiasynda Naýryz meiramyna arnalǵan aýqymdy mádeni-kópshilik is-sharalar ótip jatyr. Biyl qala boiynsha 200-den astam is-shara uiymdastyrylǵan. Bul týraly Almaty ákimdiginiń baspasóz qyzmeti habarlady.
Merekelik negizgi alańdar – Astana alańy, Abai alańy, Jibek joly dańǵylynyń júrginshiler aimaǵy jáne Panfilov kóshesi.
Aýdandardaǵy merekelik oryndar:
Alataý aýdany – ALMATY ARENA sport kesheniniń aldyndaǵy alań (21 naýryz, 11:00-16:30)
Almaly aýdany – M. Gandi atyndaǵy saiabaq (21 naýryz, 12:00-16:00)
Áýezov aýdany – Sairan kóliniń batys jaǵalaýy (21 naýryz, 11:00-16:30)
Bostandyq aýdany – Tuńǵysh Prezident saiabaǵy (21–22 naýryz, 13:00-16:00)
Jetisý aýdany – Almaty ippodromy (21 naýryz, 11:00-17:00)
Medeý aýdany – Pýshkin kóshesindegi júrginshiler alleiasy (21 naýryz, 11:00-15:00)
Túrksib aýdany – S. Seifýllin atyndaǵy saiabaq (21 naýryz, 10:00-16:00)
Naýryzbai aýdany – №221 mektep aýmaǵy (21 naýryz, 11:00-16:30)
Negizgi merekelik is-sharalar 21-23 naýryz aralyǵynda ótedi. Bul kúnderi qala turǵyndary men qonaqtaryna arnalǵan keń aýqymdy merekelik baǵdarlama usynylady: kontsert, teatrlandyrylǵan qoiylym, kórme, mádeniet qairatkerlerimen kezdesý, sondai-aq qazaq halqynyń dástúrli salt-dástúri kórsetiledi.
21 naýryz
21 naýryz qalanyń basty merekelik orny – Astana alańy kóktemgi kóńil kúidiń, mádeniet pen erekshe emotsiianyń ortalyǵyna ainalady. Saǵat 11:00-den 22:00-ge deiin munda mýzyka, teatr, óner jáne mádeniet qairatkerlerimen kezdesýdi toǵystyrǵan aýqymdy merekelik baǵdarlama ótedi.
Tańnan bastap qonaqtar mazmundy kontserttik baǵdarlama, kórkem teatrlandyrylǵan qoiylym men ulttyq dástúrler men zamanaýi shyǵarmashylyqtyń bailyǵyn tanytatyn taqyryptyq kórmege kýá bolady. Alań keńistigi túrli interaktivti aimaqtar arqyly jandana túsedi.
Bul kúni otandyq estrada juldyzdary qatysatyn gala-kontsert bolady. Sahnada Medeý Arynbaev, Sáken Maiǵaziev, Nurjan Kermenbaev, Ernar Aidar, Jarqynai Hanaiym, Alen Samyqenov, Ábik Jeksen, Juldyz Ómirǵali, Dinaia, Saltanat Baqaeva, Móldir Áýelbekova, Áset Esjan, Ázimbek Bailin, Erden Jaqsybek, Muhtar Hanzada, Nursultan Nurberdiev, Talǵat Kúzembaev, Nurmuhammed Jaqyp, sondai-aq «Dos-Muqasan», «Ulytaý», «KeshYOU» jáne «Alashuly» toptary óner kórsetedi.
Keshtiń sharyqtaý shegi – arnaiy qonaq retinde ázerbaijandyq ánshi Roza Zergerli óner kórsetedi.
Astana alańynda 6 taqyryptyq kiiz úi tigiledi:
• «Uly dala áýeni» kiiz úii — munda Abai, Jambyl, Dina, Aqan seri, Birjan sal syndy kórnekti tulǵalardyń mýzykalyq aspaptarynyń ekspozitsiialary (kóshirmeleri) usynylady.
• Robo-kiiz úi — kelýshiler nazaryna pikselder arqyly beine jasaityn, qaǵaz ushaqtardy ushyratyn, týrnikke tartylatyn robottar, sondai-aq Dúniejúzilik ǵarysh olimpiadasyna daiyndalǵan zymyran úlgileri tanystyrylady.
• DIGITAL 360 KÓRINIS kiiz úii — ainalmaly jáne edendik LED-ekrandarmen, arnaiy dybystyq effektilermen jabdyqtalǵan keńistik. Munda kelýshiler Shymbulaqtaǵy qardyń syqyryn estip, ekrannan taý betkeiinde syrǵanap júrgen snoýbordshylar men qar barysyn kóre alady. Qonaqtar Medeý men Shymbulaqtyń kórkem tabiǵatymen, saq qorǵandarymen, qalanyń úzdik meiramhanalarymen virtýaldy túrde tanysyp, almatylyq aport — Sivers almasynyń tarihy týraly bile alady.
• «Saq murasy» arheologiialyq kiiz úii — Qyrym Altynbekov negizin qalaǵan ǵylymi-restavratsiialyq zerthananyń sýretshi-restavratory daiyndaǵan ǵylymi rekonstrýktsiialar kórmesi usynylady. Ekspozitsiia saq dáýiriniń arheologiialyq murasyna arnalǵan.
• «Dástúr kody» etno-dizain kiiz úii — almatylyq sheber, dástúrli «biz keste» óneriniń ókili Zeinelhan Muhamedjanulynyń týyndylary, etno-dizainer Aida Kaýmenovanyń toptamalary jáne Almaty mýzeii qorynan zergerlik buiymdar qoiylady.
• «Mura» ulttyq mádeniet kiiz úii — munda uly qazaq aqyndaryna arnalǵan teatrlandyrylǵan kórinis pen poetikalyq qoiylym usynylady.
Merekelik kóńil kúi Abai alańyn da qamtidy. Munda 21 naýryz kúni saǵat 12:00-den 22:00-ge deiin qala turǵyndary men qonaqtaryna arnalǵan mazmundy ári aýqymdy baǵdarlama uiymdastyrylady.
Kúni boiy qonaqtar mádeni, oiyn-saýyq jáne sporttyq is-sharalarǵa kýá bolady. Alań merekelik rýhty sezingisi keletinderdiń basyn qosatyn ortalyqqa ainalyp, munda túrli kórmeler, festivalder, interaktiv belsendilikter, sporttyq oiyndar men kópshilik serýender ótedi.
Sahnada Aigúl Úlkenbaeva, Arkaiym toby, Il canto jáne La Bella kvartetteri, Móldir Áýelbekova, Nursultan Nurberdiev, sondai-aq zamanaýi oryndaýshylar Kyle ruh, Nurbullin, Sábira Sadyrqojaev, Aibar Sanbai, «Ágýgai» ansambli, «Sardar» etno-ansambli, «Saq» toby, Nursad, Aikentai, AyaFUNK, Astra, Moonlight, Amalyat, «Alfa» toby jáne Ayree óner kórsetedi.
Sonymen qatar 21-23 naýryz Abai alańynda Túrki álemi halyqtarynyń kórme-jármeńkesi ótedi. Túrkiia, Ázerbaijan, Tájikstan, Ózbekstan, Qyrǵyzstan jáne Qazaqstannan kelgen qolóner sheberleri biregei buiymdaryn usynady. Kórme-jármeńkede qonaqtar Ázerbaijannyń qolmen toqylǵan kilemderi men vitrajdyq órnekterin, Túrkiianyń áigili keramikasyn, Ózbekstannyń Rishtan kógildir keramikasyn, Tájikstannyń siýzane jáne chakan buiymdaryn, Qyrǵyzstannyń kiizden jasalǵan shyrdaqtaryn, sondai-aq Qazaqstannyń tekemet, basqur, quraq buiymdary men zergerlik óner týyndylaryn jáne basqa da ulttyq muralardy tamashalai alady.
Qalanyń eń kórikti júrginshiler aimaqtarynyń biri Jibek joly – Panfilov kósheleri boiyn da merekelik kóńil kúi kerneidi. Munda 21-23 naýryz saǵat 11:00-den 19:00-ge deiin qonaqtarǵa arnalǵan jarqyn ári serpindi baǵdarlama usynylady.
Kúni boiy bul keńistik zamanaýi jáne dástúrli óner toǵysqan erekshe alańǵa ainalady. Qala turǵyndary men qonaqtary úshin túrli mazmundy belsendilikter uiymdastyrylady.
Kelýshilerdi Robo DJ-diń erekshe shoýy, Serpin etno-folklorlyq ansambliniń oryndaýyndaǵy «NAURYZ: Qazaq Sound» kontserttik baǵdarlamasy kútedi. Kúnniń sharyqtaý shegi – áserli «Dream Light» jaryq shoýy bolmaq.
21-22 naýryz (10:00-18:00) Arbatta dástúrli «KitapFest-2026» kitap festivali ótedi. Onda 40 baspanyń tańdaýly týyndylary usynylyp, belgili jazýshylarmen ádebi kezdesý, sondai-aq ulttyq jáne shyǵarmashylyq baǵyttaǵy sheberdiń sabaqtary uiymdastyrylady. Festivaldiń basty ereksheligi, tsifrlandyrý jáne jasandy intellekt jyly aiasynda qurylǵan Smart Yurt kiiz úii.
21-23 naýryz aralyǵynda Panfilov júrginshiler kóshesinde zamanaýi qazaqstandyq sýretshilerdiń keskindeme jáne fotosýret ónerin biriktirgen ashyq aspan astyndaǵy aýqymdy kórme uiymdastyrylady. Qala turǵyndary men qonaqtary belgili qazaqstandyq qylqalam sheberleriniń týyndylaryn tamashalai alady. Bul jumystarda qazaq halqynyń dástúri men turmysy, kóshpeli mádeniet, dala beinesi men kúndelikti ómir kórinisteri kórkem ári tereń beinelengen.
Sondai-aq osy kúnderi munda «Uly dalanyń ǵajaiyptary» atty respýblikalyq etno-kórme ótedi. Kórmede qazaqstandyq avtorlardyń dástúr, mádeniet, tabiǵat jáne etnikalyq murany beineleitin fotosýretteri usynylady. Ekspozitsiia elimizdiń bai mádeni murasyn jetekshi fotograftardyń obektivi arqyly tanyp-bilýge múmkindik beredi.
Osy alańda turǵyndar men qonaqtar úshin zamanaýi interaktivti alleia usynylady: LED-ekrandarda «Jeti qazyna» simvoldary kórsetilip, Naýryz merekesiniń baǵdarlamasy tanystyrylady jáne qaladaǵy negizgi lokatsiialar boiynsha navigatsiia qamtamasyz etiledi. Sonymen qatar «Almaty AI – Bolashaqqa saiahat» atty LED-týnnel jumys isteidi. Bul Almaty qalasyn jasandy intellekt kózqarasymen tanytatyn biregei keńistik. Budan bólek, ashyq aspan astynda «Halyqtyq karaoke» formatyndaǵy 4 karaoke alańy uiymdastyrylady.
22 naýryz
22 naýryz saǵat 11:00-den 22:00-ge deiin Astana alańynda aýqymdy merekelik baǵdarlama uiymdastyrylady. Baǵdarlama aiasynda kontserttik qoiylym, kópshilik serýen, kórme jáne ózge de mádeni is-sharalar ótedi.
Kontserttik baǵdarlamada Álisher Kárimov, Marsel, Turar, Belluci, Nurjan Abai, Ajar Nazar, Iliias Qabdyrai, Ray, Baha, Sanzhar Jumasitov, Astra, Zhenis, Jasulan Kópbergen jáne basqa da óner juldyzdary sahna tórinen kórinedi.
Sol kúni saǵat 11:00-den 21:30-ǵa deiin Abai alańynda da keń aýqymdy merekelik baǵdarlama usynylady. Munda kontsert, halyqtyq serýen men kórme uiymdastyrylady.
Abai alańynda «Dos-Muqasan» toby, Álisher Qonysbaev, Baljan Bidash, Aiqyn, Tólepbergen, Áli Oqapov, Nurjan Kermenbaev, «KeshYOU» toby, Ademi, Axallek jáne ózge de oryndaýshylar óner kórsetedi.
Jibek joly – Panfilov júrginshiler aimaǵynda saǵat 12:30-dan 19:00-ge deiin «Jeldirme» dástúrli mýzyka kontserti, qýyrshaq teatrynyń qoiylymdary, Robo DJ shoýy jáne «Dream Light» jaryq shoýy uiymdastyrylady.
23 naýryz
23 naýryz Astana alańynda merekelik baǵdarlama saǵat 11:00-den 18:00-ge deiin jalǵasady. Sahnada Didar Káden, Saia Mahambet, Dáýit Turǵynáli, Balaýsa Erǵalina, Aidar Abdrahmanov, Jaqyp Nurmuhammed, Maidan Aimaýyt, Bostan Nurdáýlet, Turdaly Dastan jáne kópjanrly «Parasat» etno-ansambli óner kórsetedi.
Abai alańynda saǵat 11:00-den 21:30-ǵa deiin aýqymdy merekelik baǵdarlama uiymdastyrylady. Baǵdarlama aiasynda kontsert, kópshilik serýen, kórme jáne basqa da mádeni is-sharalar ótedi.
Kontsertte Roza Rymbaeva, Aidana Medenova, Jubanysh Jeksenuly, Dakelot, Sanzhar, 404 toby, «Dervishi» ansambli, «Dýdarai» toby, Tilek Bazarov, Rano, Botagóz Ǵazizqyzy, «Tumar» toby, «Jumyr qylysh» toby, Ersultan Stamǵaziev, Bolat Qusaiynov, Alýa Erbolatqyzy jáne ózge de artister óner kórsetedi.
Jibek joly – Panfilov júrginshiler aimaǵynda saǵat 12:00-den 19:00-ge deiin túrli is-sharalar uiymdastyrylady: qýyrshaq teatrynyń qoiylymdary, Robo DJ shoýy jáne «Dream Light» jaryq shoýy ótedi.
Sonymen qatar 21-25 naýryz aralyǵynda «Alataý» dástúrli óner teatry aýmaǵynda (Nurkent shaǵynaýdany, 6) kóshpeli shapito formatyndaǵy «Naýryz shoý» tsirktik baǵdarlamasy ótedi.
Baǵdarlamaǵa Resei, Ýkraina jáne Qazaqstannan kelgen úzdik artister qatysady: gimnastar, akrobattar, úiretilgen itter, ekvilibrister men áýe gimnastary óner kórsetedi. Sondai-aq tsirktik qoiylymǵa Murat Mutyrǵanov qatysady.
21-23 naýryz aralyǵynda Almaty qalasy mýzeiler birlestigi men Qazaqstan Respýblikasynyń Ulttyq ortalyq mýzeii metropoliten beketterinde fotokórme uiymdastyrady. Naýryz meiramyn merekeleý aiasynda jolaýshylarǵa qazaq halqynyń dástúri men mádenietin beineleitin fotosýretter usynylady.
Jerasty kóliginiń jolaýshylary fotokórme arqyly Qazaqstannyń tarihy men ulttyq murasymen jaqynyraq tanysa alady.
Fotokórme «Jibek Joly», «Almaly», «Sairan», «Saryarqa» beketterinde saǵat 09:00-den 21:00-ge deiin jumys isteidi.
