Foto: Mádeniet jáne aqparat ministrliginiń baspasóz qyzmeti
Búgin Almatyda Túrkiianyń tuńǵysh Prezidenti Mustafa Kemal Atatúrikke arnalǵan eskertkishtiń saltanatty ashylýy ótti, dep habarlaidy "Ult aqparat" Mádeniet jáne aqparat ministrligine silteme jasap.
Eskertkish 2023 jyly kórnekti túrik halqynyń kóshbasshysy Mustafa Kemaldyń qurmetine Almaty qalasynyń ákimdigimen ornatylǵan.
Ashylý saltanatyna Mádeniet jáne aqparat ministri Aida Balaeva, Túrkiia Respýblikasynyń Qazaqstandaǵy Elshisi Mustafa Kapýdjý, TÚRKSOI Halyqaralyq uiymynyń Bas hatshysy Sultan Raev, Almaty qalasynyń ákimi Erbolat Dosaev, túrik diasporasy men ziialy qaýym ókilderi qatysty.
Saltanatty jiyndy ashqan ministr Memleket basshysy Qasym-Jomart Toqaev eskertkish ornatý týraly tapsyrmany Túrkiia Respýblikasynyń 100 jyldyǵyna orai Rejep Taiyp Erdoǵannyń Qazaqstanǵa sapary kezinde bergenin atap ótti.
«Túbi bir, tarihy tamyrlas Túrik eli biz úshin keshe de, búgin de tilegi ortaq, maqsaty bir baýyrlas memleket. Memleket basshylarymyzdyń arqasynda osy kúnderi bizdiń elder arasyndaǵy qarym-qatynas jańa deńgeige kóterilip, qazirgi tańda barlyq salalar qarqyndy damyp keledi. Ásirese, baýyrlas eki el arasyndaǵy yntymaqtastyqtyń altyn kópiri bolǵan mádeni bailanysymyz zor. Bul rette Túrkiia tarihynda óshpes iz qaldyrǵan qazirgi túrik memleketiniń negizin qalaýshyǵa erekshe mán beriledi. Ol júzege asyrǵan mádeni, saiasi, ekonomikalyq, áleýmettik reformalarymen zamanaýi qoǵamnyń qurylýyna baǵa jetpes úles qosty. Memlekettiń damýyna negiz bolatyn reformalar kúni búginge deiin jalǵasyp keledi», - degen Aida Balaeva eskertkish Túrkiianyń tarihi murasyn qurmetteýdi ǵana emes, eki eldiń dostyǵy men yntymaqtastyǵyn da beineleitinin atap ótti.
Biiktigi 3 metrden turatyn qola eskertkishtiń tuǵyry granitten jasalǵan. Eskertkishtiń avtorlary qazaqstandyq músinshiler - Aidos Búrkitbaev pen Timýr Ermuhametov.
